Rai ka KHADC wow kyntu ya u lat wow pynkrehkaam noh ya ka ILP

Shillong: Ka Executive Committee (EC) yong ka Khasi Hills Autonomous District Council (KHADC) kawa pynman ynnin ka sngi da rai ki wow kyntu ya u Lat ka jylla wow pynbna paidbah (Notify) ya i pynkrehkaam ya ka Bengal Eastern Frontier Regulation 1873 wei lada ye u pynkrehkaam ya ka kamtæ ya ka Inner Line Permit (ILP) leh da ye u pynkrehkaam ya ka.

Hawa yaklam wa u HS Shylla uwa man leh u Chief Executive Member (CEM) ka KHADC hadien wa da wai ka yalang yong ka Executive Committee da ong u “hawa nujor wa ka aiñ Village and Town Police yong ka Jaiñtia Hills em ko du i kajiak i yaphær wei i haap i wow pynbait ya ini wei wow phah biang cha ka sorkar khnang wow mynjur noh ya kani ka Village and Town Police yong ka KHADC”.

U Shylla da ong u, “Neidaw wa katni wa da emkaam jhan ya kani ka aiñ neibhah nadooh ka 19 tarik Naitung 2017 da yoh ya ka chithi na u W Rapthap, Under Secretary yong ka sorkar Meghalaya heiwa oo da thoh u cha ki le tylli ki District Council wei ha kani ka chithi da sooh lang leh ya ka dorkhat wa da e da ka HYC cha ka sorkar jylla ha ka 30  tarik u Wisu 2017,” da ong u.

Chooh chooh da ong u wa da pynemkaam ya ki Adaptation Laws yong ka snem 1952 ka United Khasi Jaiñtia Hills District (application of law 1952) wei da kani ka Regulation 1952 kawa u Governor da e kti u wei da soi ya kani da u President yong ka Ri India u Rajendra Prasad ha ka 3 tarik u Naisan 1952.

Related posts

Ki paidbah pynbor ki ya kiwa mihkhmat wow wan cha ki yalang tangwa chah khñium won lada pynemkaam Siren: Paul

November 18, 2024

Dam noh ka NPP wow kyrchaan ya ka sorkar ka Manipur wa yahkhmat da ka BJP

November 17, 2024

Neidaw wa katni kini man ki ki Aiñ kiwa da pynbna paidbah (notified) wa kiwa boon ki Central Act kiwa da booh hapoh u pood u ang yong ka KHADC wei ha kitu ki por man ko kam ka United Khasi Jaiñtia Hills wei napyrdi kini ki Aiñ da wan ka Bengal Eastern Frontier Regulation 1873.

“Ka EC ynne ka sngi da chim ko ya ka rai wa katkam kini waroh iyi wa toh u leh emkaam hapoh ki notified Act yong ka KHADC man ko wow pdiang (pass) ya ka rai (resolution) ha ka yung dorbar kawa haap wow khut ya ka dorbar wa kyrpang wei u kyntu i ya u Lat ka jylla wow pynbna paidbah (notify) ya i pynkrehkaam noh ya kani ka Bengal Eastern Frontier Regulation 1873 neibynta wow pynkrehkaam noh ya kani wei manda ye u pynkrehkaam ya ka da ye leh u pynkrehkaam ya ka ILP, ” ong u CEM ka KHADC.

Chooh chooh u Shylla da pyntip u leh wa ki jylla kiwa pynkrehkaam ya kani ka Bengal Eastern Frontier Regulation 1873, toh ka jylla Nagaland wa Mizoram wei hapoh kini ki jylla ka ILP leh krehkaam ko. Kamtæ ha i jooh i por da kyntu leh ya ka GHADC wow bood lang ki ya kani khnang yow man ryntih ko hapoh jong ka jylla.