Hadien wa mih i kynrum kynram wei maham yakhih neidaw wym chah wow lehniam ki Hindu ha krem Mawjambuin ha Mawsynram, da sdang ye wow pyn jai-jai heiyatoh wa ini heiwa ka seiñ niam Hindu wa tip kam ka Kutumba Surakshya Parishad (KSP) da rai ko wow dam chipor yei thmu wow yakhih hadien wa da khut yaklam ka sorkar Meghalaya ya ka ha Shillong ha ka 3 tarik u Duyatra (Jan) 2025.
Ka KSP da pynbna ko wow sangeh na kiwon kiwon ki jait yakhih kat hadooh katai ka sngi hadien wa chah khut yaklam ha ka Deputy Commissioner ka East Khasi Hills.
U President ka KSP, u Satya Ranjan Borah da ong u wa da sangeh chwa yei yakhih weiwa daw pait iyi wow mih na ka yalang chwa wow chim ya iwon iwon i rai.
U Borah da ban u wa i thmu ka KSP toh wow lait na i wym sñiawthooh yumut wei ym kwah ki wow chah ktah nei sñiaw niam wei jaitbru neibhah wa da leh ki yeiwa emkaam katkam ka Article 51(A) yong ka riti synchaar ka ri.
Da e khublei u leh ya ka sorkar Meghalaya wa da khut yaklam wei da kyntu leh wow kynthuplang ya kiwi kiwa embynta kam kiwa mihkhmat na ki dorbar chnong wa ka Seng Khasi Hima Mawsynram.
Ka KSP da kyrpaad ko leh wow yoh u lai pait ya kani ka krem khnang wow sñiawthooh rap miat ya ini i kaam.
Discussion about this post