Rai ka Meghalaya wa Assam wow rah noh ya ki pulit na khappood wei wow booh da ki CRPF

Ka yalang yong ki Montri Rangbah ka Meghalaya wa Assam kawa da pynman ynne ka sngi ha Guwahati da rai wow rah noh ya ki pulit na Block-I, Khanduli wa Psiar kiwa man ki khappood wa em i ya kajia wei heithaw ki pulit daw booh noh da ki pulit CRPF ki wym yachah chiliang.

Hawa klam hadien wa wai ka yalang, u Montri Rangbah ka jylla Meghalaya, u Conrad K Sangma da ong u wa ha Block-I wa Psiar wa jooh mih ki kynaad daw rah noh ko ya ki pulit na kini ki thaw wei daw phah noh da ki CRPF wei kamjooh ha ki thaw yong ka Assam leh daw phah yang noh da ki CRPF, wei da pyntip u leh wa ki pulit kiwa da booh ha kiwi leh ki thaw ha ki thaaiñ khappood daw kyrriah noh ki yow wanrah yei sñiaw chngaaiñ kiwa chong chnong.

Da khana u leh wa ki ar ngut ki Montri Rangbah daw lai ki wow yooh kjat cha Khanduli wa Psiar hadien ka Puja iwa mut chwa u kut u Naichiphaw yow pyntikna wym em de iwon iwon i kynaad.

U Conrad da pyntip u leh wa i leh sorjamin ya ki 6 tylli ki thaw kiwa da dep pynbait ha ka wat wa nyngkong da pyndep ka Survey of India wei kattu sah su wow booh ya moopood wei u sdang noh yeini.

Related posts

Ym yoh Ticket u Baitlang na ka VPP wow yakhun MDC na Jowai South, paan u yei kyrchaan kam u kyrtong samen

November 12, 2024

La 95% da ye u pyndep kreh ka Scheme saam um ka Mihmyntdu wa chongdor Rs. 32 klur

November 9, 2024

Neiliang won u Montri Rangbah ka Assam, u Himanta Biswa Sarma da ong u wa ha Khanduli-Psiar dang ini wa dep ki pulit Assam da booh Outpost ki wei ki pulit ka Meghalaya hadien ini da wan ki wow booh Outpost markhmat wa kani iwa da man kam ka yaleh mar dei khmat wei ha kani ka Outpost ki pulit Assam daw booh noh ki da ki CRPF wei kamjooh ka Meghalaya u rah noh ko ya ki pulit yong ki na ini i thaw rap chadien yow lait u em ki pulit ka Meghalaya kamjooh ka Assam ha ki thaw wa ya kajia hiwot deiwa rah ki 200-300 Meter chadien wei ha ki thaw wa em i ya kajia u em bait du ki CRPF donhi.

Ha iwi won i liang, u Himanta da ong u leh wa ka jylla Assam kwah wei da pynkhreh ko wow rai smat yow pyndep noh chwa ya ki 3 tylli ki thaw wa ya kajia ha kani ka bhah wa ar wa katni, wei kini ki thaw kynthup ki ya ka Langpih, Borduar wa Deshdemoria neibhah kini ki thaw ym toh kiwa haap hapoh ka 6^th Schedule neiliang ka Assam wei rap suk u pynbait wei da phah leh ya ki Regional Committee wow pynyoo ki yeiwa chem ki khlem da chimpor yow ye u pynbait smat ya kini ki 3 tylli ki thaw.

Heiyatoh won wa ki 6 tylli ki thaw wa da dep wow soi ya ka soskular MoU, u Himanta da ong u wa Survey of India da dep ko leh ya ka sorjamin ya ka Hahim wei daw booh noh ya u payapood wei waroh ki ar tylli ki jylla da pdiang ki yeini.

Chooh chooh da pyntip u wa ynne da emlang leh ki bru ka Survey of India wei da phah ya ki wow pynsmat ki u pyndep sa ya 5 tylli ki thaw chwa ka 31 tarik u Kmaichonglad (Dec) uni u snem.

Hawa yatoh wa ka Tarabari da ong u wa em kawi ka chnong ka wym hun tangwa ka Assam smat ko wow pynjem hawa liar ya u pood yow lait kiwa chong chnong u khuslai deiwa pynjem katwa ye.

Kiwi de kiwa emlang ha kani ka sngi neiliang ka Assam kynthup lang ya ki Montri sorkar kam u Chandramohan Patwary wa u Atul Bora deilang wa kiwi ki sahep sorkar.

Neiliang ka Meghalaya da em u Deputy CM, u Sniawbhalang Dhar, u Montri sorkar, u Comingone Ymbon wa ki MLA kam u Lahkmen Rymbui, u Nujorki Sungoh, u CEM ka JHADC, u Thombor Shiwat wa u MDC ka Barato-Mukroh, u Aiborlang Shadap kiwa man leh kam ki dkhot ka Regional Committee.