Hadien wa rai ka Meghalaya Editors’ and Publishers’ Association (MEPA) wow sangeh u pynmih ya ki khubor yong ka 2nd North East Olympics Games 2022, ynne ka sngi u Commissioner & Secretary, Finance ka sorkar jylla, u Vijay Kumar da khut yaklam u ya ka MEPA wow pynbait ya i kaam.
Neiliang ki 8 ngut ki dkhot ka MEPA ynne hapoh i yahkhmat u President, u R. Monarch Shabong wa u General Secretary, u John W. Thabah da yachem ki wa u Kumar ynne ha kamra krehkaam yong oo.
Neiliang ki heh ka MEPA da beiñ ki ya i rukom krehkaam ka sorkar heiwa da e ya ki Advertisement neibynta ka North East Olympic Games 2022 du cha ki khubor na baar jylla.
Ka MEPA da beiñ ko leh ya i jied ka sorkar du ya kiwa ngait donhi wow e Advertisement heiwa da dawa wow e ya ki Advertisement salonsar cha ki laad pathai khubor ka jylla.
U Kumar da kular u wow chimkhia yeini wei da kular u leh wow e ya ki Advertisement yong ka North East Olympic Games cha waroh ki khubor wa em ha jylla khlem ñiaw chiliang wei da kyntu u leh ya ka MEPA wow sdang biang noh e ya ki khubor heiyatoh wa kani ka lympung.
Hadien ini neiliang ka MEPA da rai ko wow sdang pynmih biang ya ki khubor wa yatoh wa kani ka lympung wa da pynman ha nongbah Shillong.
