Ha ka yalang paidbah wa pynman da ka Mukhla Dorbar Pyllun ha ka janmiet yong ka 23 tarik uni u bnai ha Community Hall ka Mukhla Dorbar Pyllun kawa da emlang ki paidbah wa da khut da ka Mukhla Dorbar Pyllun na ki 5 Waheh Chnong hapoh ka Mukhla Pyllun, da kawi ka sur, ki paidbah wa chong chnong kynthai wa chynrang ryngkat wa ki waheh da chim ki yei rai wow kyrchaan tylli biang ya u MDC wa katni, u Ailad Bhoi uwa man kam u kyrtong ka NPP wow yakhun ya kani ka Election MDC na ka 5-Mukhla Ummulong Constituency.
Ya kani ka yalang paidbah da pynlai ya ka da u Chairman wa chipor donhi u Teng Sari uwa man leh heijooh i por u Chairman ka Dorbar Chnong Mukhla Nongrim, wei da wan ya chimbynta ha kani ka yalang da kiwa yakhmat chnong nadooh u Waheh Chnong ka Mukhla Nongrim, u Waheh Chnong ka Mukhla Mission, u Waheh Chnong ka Mukhla Shohshrieh, u Waheh Chnong ka Ladmukhla wa u Waheh Chnong ka Mukhla Umlangshor deilang u General Secretary/President ka Mukhla Dorbar Pyllun, kiwa chong chnong kiwa da tymmen chirup u Skit Sari, MDC warim ka thaaiñ, u Martu Sari uwa man leh uwa yahkhmat ka Mukhla Dorbar Pyllun wa u MLA ka Jowai, u Wailadmiki Shylla uwa man leh u khon ka Mukhla Dorbar Pyllun.
Da wanlang leh ki manbei manpa ki 5 chnong ka Mukhla yow e yei kyrchaan wa pura ya u Ailad Bhoi yow pynjop emburom ya oo sa ha kani ka kynti kamwa dadep pynjop ya oo ha ka Election MDC 2019.
Kamtæ lyngba kani ka khubor, ka Mukhla Dorbar Pyllun da phah ko cha phi ki khon ki paaid yong ka 5-Mukhla Ummulong MDC Constituency wa ka Mukhla hi waroh kawi wow kyrchaan chibor donhi hei dur yong ka kot ka NPP Party ya u kyrtong, u Ailad Bhoi.
Discussion about this post