Ka sorkar Meghalaya Democratic Alliance (MDA) hadien wa da ya phyllu sani bha ynne ka sngi ha ka kynhun Montri da chim ya ka rai wow e laad ya ka Meghalaya Energy Corporation Limited (MeECL) wow pynbha pynjanai yei krehkaam ka chnat Bordiñ.
U Montri Rangbah ka jylla, u Conrad Kongal Sangma da ong u wa ka sorkar hadien wa da yatai bniah bha da ki Montri, da sñiaw wow e laad ya ka MeECL deilang wa ki kyndon wa hap ko wow pynbha yei rukom krehkaam heiwa da chim leh ya ka rai wa ka sorkar u bahkhlieh ko wow su ya ka ram Aatmanirbhar Loan waroh 100% yong ka MeECL kawa da poi T.1345 klur.
Ha i jooh i por u Montri Rangbah da ong u wa ka sorkar ym pu em chim ko ya kawon kawon ka rai wow ekti pynlai ya ki chnat wei khamtam ya ki 2 tylli ki Circle ka MeECL cha ka RECPDCL, tangwa neiliang ka sorkar u pyrchang ko wow thooh ki laad ki luti wa kammon wow pyndooh yei eh wa yachem hapoh ka MeECL.
U Conrad da ong u leh wa neidaw wa da em i booh kyndon hawa chim ya ka ram Aatmanirbhar Loan da ka REC wa PFC, neiliang ka sorkar daw hap pyntip ko ya ini i rai wa da chim ynne ka sngi cha ka REC.
Chooh chooh da ong u wa i kitkhlieh ka sorkar 100% ya ka ram toh deiwa booh leh ya kani ka poisa kam chibynta ka mang tynga ka sorkar wow wanrah ya ki kaam pynroi hapoh ka jylla (State’s Development Budget) wei ka MeECL daw hap ko wow bood ya ki kyndon wow pynthymme yei rukom krehkaam deiwa booh da i por wow poi cha ka thong deiwa kular cha ka sorkar wow leh ya ini deiwa pynchah da kiwa em ha ka MeECL.
