Katwa dang lai ki sngi, i chah ktah ka jylla ha ka khlam COVID-19 dang pteiñ i heiwa ynne ka sngi neiliang u montri ka chnat i chait i khiah, u Alexander Laloo Hek da ong u wa kamwa man katni ki PHC wa ki CHC ha ki thaaiñ palatsor dang em ki chiboon i duna, heiwa da ong u wa da em ki thaw wa da rai wow booh noh da ki ICU wa Ventilator, tangwa da em i sñiaw won wa ini ym em yumut i neibhah ym em ki wakreh.
Da ong u leh wa iwa emkaam dooh toh wow pynbiang ya kiwa kreh ha i chait i khiah, neibhah kamwa man katni dang duna kiwa kreh ha ki thaw sumaar.
Chooh chooh da ong u wa ka sorkar da e laad ko wow thung ya kiwa kreh ha ka chnat tangwa chitom wow yoh ya kiwa kreh kiwa da chemphang wei dep puræ, da pynrap u leh deiwa ong wa ka sorkar katni da pyrchang ko wow pynbiang ya kiwa kreh katwa ye ha ki bynta wa man kongsan khamtam ha Shillong.
U Hek da kubur u leh wa ki thaw sumaar ha ka jylla ympu man ki kiwa da biang lut liang wanang deiwa pynrap biang u wa neiliang ki Doctor kiwa em ha ka jylla da yaleh ki wow e chakri cha ki paidbah ha kam kini ki por wa ka jylla da man ko kawa chah ktah bha ha ka khlam.
