Ka Synjuk Waheh Shnong Ri Jaiñtia (SWSRJ) kawa kreh ha waroh kawi ka Ri-loom Jaiñtia ynne ka sngi da yaklam ko wa kiwa pathai khubor heiwa u President ka seiñ, u Arminius Lypon da ong u wa ka sorkar jylla da pynmih ko ya ka hukum wow phah pyndait Smat Meter noh ya ka MeECL cha waroh ki manyung.
Da ong u wa ka synjuk ha ka yalang wa da man ha u Kmaichonglad 2021 da rai ko wow pyrchah chwa wow pyndait ya ki Smart Meter ha ki yung bru.
Da ong u wa katni boon ki bru kiwa kreh na kti ha ktien namo ki BPL kiwa daw chem chitom bha ki neibhah boi manda pyndait ya kini ki Smart Meter daw chah ktah bha ki.
Chooh chooh da kyntu u ya ka MeECL wow pynman da ki Public Hearing wa i pynsñiawthooh paidbah hajrong ini chwa wow lai ko chaphrang wow pyndait ya ki Smart Meter.
Da kyntu u leh ya ki 7 ngut ki MLA na Ri-loom Jaiñtia wow pynche ki hajrong ini i thmu khnang wa kiwa chong chnong ym chem chitom ki.
Heijooh i por da kyntu u ya kiwi ki Waheh Chnong ka Ri-loom Jaiñtia waroh kawi wa lada wan ki bru ka chnat wow pyndait ya kini ki Smart Meter wow pyndam chwa ki kat wympu yoh yei pynche hajrong ini i kaam khnang wow lait ki paidbah u chah ktah.
