Shillong: Ka United Democratic Party (UDP) da chim ko ya ka rai wow pynyakhun bait ko da u kyrtong wa man wa ar ha ka Election wa dang dep wot, u Pius Marwein neibynta ka Election chiteiñ samoi ha Ranikor Constituency.
Yeini i rai ka UDP da chim hadien ka yalang yong ka Co-ordination Committee kawa da thooh yumut leh na kiwa kyrchaan ha ka 10 tarik uni u bnai, da rai ki ya u kyrtong wa monlang heiwa da emlang leh u Chairman ka PDF, u Pynshngain N. Syiem uwa paan yei kyrchaan na ka UDP ha kani ka Election ha Ranikor.
Hawa yaklam wa kiwa pathai khubor, u General Secretary ka UDP, u Dr. Jemino Mawthoh da ong u wa ka Party da chim ko ya kani ka rai hadien wa bichaar bniah bha ko ryngkat i syllok wa kiwa kyrchaan ya ka Party neibhah u Pius ha ka Election wa dang dep da yoh u hadooh 8950 Vote wei da rem salit hi-eh u ha u Martin M Danggo.
Da ong u leh wa u Pius hanlada dang yakhun u ha ka sien wa nyngkong ha ka MLA Election wa dang dep wot, tangwa da rem emburom u du da ki kajiak Vote donhi deiwa yoh u 8950 Vote.
Chooh chooh da ong u leh wa hanlada u PN Syiem man u uwa da paaw bha ha ka saiñ pyrthai, tangwa daw chem chitom u wow jop na Ranikor neibhah wa man ko ka Constituency kawa heh wei ymye u wow lai lut cha waroh ki thaw ha i por wa tbian.
Da kyrpaad u leh ya u Pynshngain wa ya ka party PDF wow e i kyrchaan ya u Pius ha kani ka Election.
Neiliang u Mawthoh da ong u leh wa ya ini i rai ka Party wow pynyieñ da u kyrtong yong ka hi daw pyntip noh ko cha u Chairman ka PDF wei daw phah leh ya ka chithi wow paan yei kyrchaan ya u Pius.
Discussion about this post