Hadien i pynbaad hajrong i rukom krehkaam ka sorkar Meghalaya Democratic Alliance, khamtam hajrong i baam-tooh hapoh ka Meghalaya Energy Corporation Limited wow pynkrehkaam ya ka Saubhagya Scheme, da pynman ya ki seiñ saiñ pyrthai kiwa em ha ka sorkar wow dawa khut pynman jhan ki ya ka yalang ka MDA Coordination Committee, ynne ka sngi heiwa u montri rangbah uwa man leh u Chairman ka Coordination Committee da khut u ya ka yalang wow pynbait yeini waroh.
Hawa yaklam wa ki heh ki seiñ wa ki MLA samen kiwa em ha ka sorkar da sñiawhun ki yeiwa pynche u montri rangbah heiwa u President ka BJP, u Ernest Mawrie da ong u wa ka yalang da man ko kawa jop wei ka Party da hun ko ya i rai ka sorkar wow phah da ka takit wa laitlooid ya ka MeECL, wei ya ka bui na ka takit daw phah cha ka sorkar hapoh le bnai.
Da ong u leh wa hadien wa phyllu yumut ka Party da hun ko yeiwa pynche u montri rangbah wei ym dawa pynhiar chuki de ko ya u James Sangma na ka chnat Bordiñ.
U President ka PDF uwa man leh u montri ha ka sorkar, u Banteidor Lyngdoh da ong u wa ka Party hun ko yei yaklam waroh ki Party haka sorkar deiwa pynrap wa ya kam kani ka yalang toh u khut pynman man-u-bnai wow yaklam hajrong ki phang wa emkaam.
U President ka KHNAM, u Adelbert Nongrum leh da pynsñiaw u wa ha ka yalang da yaklam leh wow pynbait noh ya u pood u ang wa ka Assam wei chong hei stat u montri rangbah wow leh yeiwa emkaam.
U KP Pangniang uwa man u President ka HSPDP, da ong u wa ka Party hun ko yei rai na ka yalang deiwa pyntip wa da rai leh wow pynbait ya waroh i kaam chah pynbaad hapoh ka chnat MeECL wei ym em de yaklam wow kyrriah noh ya u James kam u montri ka chnat Bordiñ.
Neiliang u President ka NCP, u Saleng S Sangma da rah u leh ya ka phang wa yatoh wa i eh i khoo wa chem ki khynnah khamtam wa pynman ya ki Online Class deiwa tyrwa ya ka sorkar wow e yarap da ki Tablet cha ki kattu katni ngut wow yarap ya ki ha i puræ.
