Rai ki 12 Dorbar Chnong wow dawa na ka sorkar wow kyrriah noh ya ki bru na ka Harijan Colony

Shillong: Ki 12 tylli ki Dorbar Chnong wa haap hapoh ka North Shillong Constituency da dawa ki ya ka sorkar jylla wow kyrriah noh ya ki bru waroh kiwa chong chnong ha Harijan Colony kawa tip leh kam ka Themmator, Iewmawlong cha ka thaw wa da pynkhreh da ka sorkar neibhah i em yong kini ki bru ha kani ka thaw da ktah ko boonsien ya ka suk ka saiñ ha ka nongbah Shillong.

Ya kani ka rai da chim ha ka yalang wa jhan kawa pynman ynne ka sngi heiwa da emlang leh u MLA ka North Shillong, u Adelbert Nongrum.

Hawa yaklam wa kiwa pathai khubor u Adelbert da ong u i kyrriah noh ya ki bru na Harijan Colony, Themmator toh u man ko deiwa sñiawthooh yumut wa jai jai wei ymtoh u mih kawon kawon ka sñiawyaphær jaitbru na kani ka kaam.

Katkam i ong u MLA, da man ko kawa emkaam wow kyrriah smat ya ka Harijan Colony neibhah kani ka thaw toh kawa khynnia ware wow pynman chnong ha kani ka thaw yong ka yaaw.

Related posts

Wa thung ka BJP da ki bru yong hi tæ mih i kynrum kynram ha NEHU: Ronnie

November 15, 2024

Dang jan u lai na Shillong cha Vietnam, Thailand, Laos, Cambodia wa Burma bar cha Delhi: Conrad

November 14, 2024

Da ong u wa ka sorkar ye ko leh wow pynman noh ya kani ka thaw kam ka thaw chongdai khamtam ya kitu kiwa chong dai cha madan khamtam ya ki tre chnong.

Hawa jubab ya i daw wa i slem ka sorkar wow kyrriah ya ka Harijan Colony na Iewmawlong, neiliang u Adelbert da ong u wa ka sorkar ha ki por wa da lai ym em ko ka mon namo i sñiawkhia wow leh ya ini. Da ong u leh wa neiliang ki Rangbah Shnong wei oo kam u MLA da dawa yei emkaam wow kyrriah noh ya ka Harijan Colony.

Da pyntip u leh wa ha ka yalang da rai leh wow dawa kem noh chisyndon ya ki damok wa emkti dat ya ki le ngut ki khynnah kiwa toh leh ki khon yong u wa yah bus soo (SPTS) wei ki pulit leh toh u pynngat ya ki ha ki kyndon aiñ wa khor khnang wa kam ini i jia ym jia de i.

Da ong u wa i wym ye ki pulit u kem ya kini kiwa emkti da wanrah ko ya ka huri huri hadooh katni.

Ha iwi tawon i liang, kiwa pynlai yong ki 12 tylli ki Durbar Shnong da kyntu ki ya ki pulit wym toh de u psiah ki cha ki chnong ki thaw ki pchem yung ki bru neibhah da wanrah ko ya ka chong syir mynsien ya ki paidbah wa sah ha ki dong waphær waphær kiwa yajan waka Motphran wei da kyntu leh ya ki bor ka aiñ wow pyndam u siat ya ki tadong pdung wa pynjhia khmat ya kiwa chong chnong.