Ha ka 6 tarik uni u bnai, ka seiñ Hynniewtrep Border Dispute Redressal Forum (HBDRF) da lai hiar ki chadooh ki chnong kiwa kdong tam kiwa em hapoh ka Elaka Labang Nangphyllut wa tip kam ka Block-I. Kini ki chnong kynthup ki ya ka Moorap, Mooriap, Syrlong, Laher, Umsalait, Mynju, Mookhim, Bandieñ Mooknor, Khyndeliar, Madan Myn-i wa Mynriah.
Ka seiñ da ong ko wa kini ki chnong toh kiwa em cha kdong dooh, kiwa dooh tam wa kiwa sahdien tam na waroh ki chnong kiwa chong wa sah da ki jaitbru Pnar. Ki chnong ki wym pu em yaaw em haat, i bordiñ umbaam umdih, ki sarok, ki luti syngkieñ, ki skur, ki thaw sumaar wa kawon kawon ka roi ka paar.
Da pynman leh ya ka yalang da ka Forum wa kini ki chnong yow pynsñiawthooh ya ki chaphang ka yurim wa i sakhiat hajrong i dawa yong ki wow pynuiñ biang ya kani ka thaaiñ cha Meghalaya. Da pynchlur wei da e bor e mynsien ya ki wow man kiwa neh chah hei lai luti yong ini i kaam yow wanrah yei sñiaw yajooh yajan hapyrdi ki paaid Pnar.
Yaka yalang da pynlai da ka Purity Phawa, Secretary yong ka Forum, da yoh yei klam da u Chandame Sungoh, Chairman yong ka Forum, u Thomas Passah, Senior Spokeperson wa na ki bru waheh yong kani ka thaaiñ, u Phrit War wa u Tuner Lyngdoh.
Da yoh leh wow saam wei e yarap da ki that cha kiwa chong chnong kani ka thaaiñ kiwa da e sñiawbha da ki kattu katni ngut ki paralok wa sbun.
Ki paaid chong chnong yong kani ka thaaiñ da pynsñiaw ki yei kwah wa i thrang wa i kut yumut wow em bait ha Meghalaya kamwa da jooh nadooh nachwa. Da hun wei kut yumut wym pdiang de ya kiwon kiwon ki Grant, ki Scheme na ka sorkar Assam kat wym pu tikna u pood u ang hanlada wan ki deiwa phon wa pah lane deiwa pynbor, dei kyrpaad leh yaka sorkar Meghalaya wow pyndep smat ya ini i kaam pynbait pood khnang wow lai bait ka synchaar khadar wei wow wanrah yei chongsuk chongsaaiñ wa ka roi ka paar.
Kiwa klam kani ka Forum da pynsñiaw ki yei sñiawkhia wa joor hajrong i eh wa khroo tam wa ki paradoh parasnaam kiwa chong wa sah cha kini ki thaaiñ wa maad ki, wei da kular ki leh wym ieh ya ki ha iwon iwon i por lane ha iwon iwon i eh wa i emkaam yong ki.
