Ka yalang yong ka Regional Committee ka West Khasi Hills District ka Meghalaya wa ka Kamrup Sector ka Assam ynne ka sngi da rai wym pu pyntip yei pyrtuid ki chnong wa yaknieh hapyrdi ka Assam waka Meghalaya neibhah daw hap lai pait chwa ya ki thaw wei wow yachem ya ki paidbah ka thaaiñ yow sñiaw ya ka sur yong ki.
Kani ka yalang ka Regional Committee ha Shillong toh ka sien kawa ar hadien wa yachem chwa ha Guwahati neibynta wow pynbait ya u pood u ang ha ka wat wa ar hapyrdi ki ar jylla. Na Meghalaya da yahkhmat da u Montri ka sorkar, u Paul Lyngdoh katwa na Assam won da u Montri sorkar, u Chandra Mohan Patowary.
U Paul da ong u wa da e kti ha ki Deputy Commissioner wow pynlum pynlang ya waroh ki chnong wei wow pynbait ya ki thaw wa man hapyrdi khnang wa ka Committee u lai yachem ko ya ki paidbah hadien wa kut ka Dorbar Pynmih Kba yong ka Meghalaya waka Assam.
U Paul Lyngdoh da ong u wa ka yalang man ko kawa mih soh bha heiwa ki kaam da lai ki chaphrang deiwa pynrap wa da pynkhian ya ki thaw wa kajia wei da pynkup ha ki DC wa kiwa mihkhmat paidbah na ka thaaiñ wow pynkhreh ya ki pyrtuid ki chnong wei hadien ka Regional Committee daw lai yachem won wa ki paidbah chwa u kut u Naikhynde hadien wa kut ka dorbar ka yung chna aiñ.
Katwa neiliang u Patowary da ong u wa i yaklam man iwa sñiawsuk na waroh ar liang wei hadien wa kut ka Dorbar Pynmih Kba daw lai pait lang ya ki wei wow yaklam yow poi cha i pynkut.
Hawa kyntait u khana ya ki thaw wa yaknieh, u Patowary da ong u wa ympu man u khana ya ki pyrtuid ki chnong khlem lai pait ya ki thaw wei wow sñiaw ya i sur ki paidbah wei da kyrmen u wa i klam u man iwa jop.
U Paul da ong u leh wa ym kwah wa kawon kawon ka seiñ næ ki bru u chim kabu ki na i yaklam wa dang lai chaphrang.
Discussion about this post