Ka yung kasari u Additional District & Sessions Court, Sealdah ynne da rai pynrem ko ya u Sanjay Roy deiwa ong wa emkti u wow tynyap wei slaitbor ya kawi ka Doctor ha ka Hospital sorkar kawa tip kamka R.G. Kar Medical College & Hospital wa em ha Kolkata.
U Judge Anirban Das da pynbna u yei rai deiwa emlang u Sanjay Roy hapoh ka yung bichaar wei da emlang leh ka bei u pa yong ka Doctor ha pchem ka yung bichaar.
Ka yung bichaar da rai pynrem ko ya u Sanjay deiwa pait ya ki sabut wa da wanrah da ka CBI wei da rai pynrem ya oo hapoh ka Section 64, 66 wa 103(1) ka BNS heiwa i pynchitom toh deiwa kset chi rta wei ye leh deiwa chah pynkut noh i mynsien.
U Judge da khana u wa u Sanjay Roy da psiah u cha kani ka Hospital ha ka 9 tarik u Naisaphra wei da ksih u ka kani ka bru hadooh wa yap wei hadien won da slaitbor u ka.
U Sanjay hadien wa rai pynrem dang yasaaid bait u wym em leh u yeini deiwa ong leh wa kitu kiwa leh yeini da yoh ki wow lai laitlooid heiwa neiliang u Judge da ong u wa daw e laad wow klam u ha ka 20 tarik haka sngi wow pynbna kammon wow pynchitom.
Neiliang ka bei wa u pa ka Doctor da yaam ki mar ya sñiaw yeiwa pynbna ka Court wei da ong u pa wa ka yung bichaar da leh sakhiat ko yei kaamram wa da pynkit ha ka.
Discussion about this post