Shillong: U MLA warim ka Nongkrem, u Ardent M Basaiawmoit da pynbna u wow mih madan biang deiwa sdang da ka yakhih paidbah pyrchah ya ka sorkar ha ka 6 tarik uni u bnai ka wow man ha Madan Student, Jaiaw Shillong.
Hawa yaklam wa kiwa pathai khubor ynne ka sngi u Ardent da ong u wa kani ka yakhih u man ko hajrong ka Inner Line Permit (ILP), ka Citizenship (Amendment) Act, 2019, wa ka Sixth Schedule, kiwa da booh ya ki paidbah hei langoh, neibhah iyi wa ka sorkar India da leh ko ha ki kajiak sngi wa dadep.
Da ong u wa ini man i hadien wa yoo u wa ha ki snem wa dadep em boon ki yakhih kiwa heh tangwa kut ki khlem mih soh wei kam u wakreh neibynta ki paidbah ym hun u.
Da ong u leh wa i yakhih ym man i du hajrong ki aiñ ka sorkar pyrdi tangwa ha waroh ki eh i khoo wa yachem ki paidbah, i hiar i yoh i la ki bru, i chah lute ka spah rymaw, i ku i baamtooh wa kiwi kiwi.
Da ong u wa i dawa Inner Line Permit da em i pyrchang ka sorkar wow yah bakla ya ki bru wei ya ka CAA leh ka sorkar ym em u leh ko iwon iwon deiwa pynbaad wa lada ka NPP ha Manipur beh seiñ ko ya u MP wa kyrchaan CAA, tangwa ha Meghalaya ym em u beh ko ya ka MP na kani ka jylla.
Ha iwi i liang u MLA warim da kyntu u ya ki paidbah wow mih yonglang ki cha kani ka yakhih paidbah.
Discussion about this post