Jowai: U Dawan Lyngdoh uwa man leh u Waheh Chnong yong ka Namdong– A ynne ka 14 tarik da khut u ya ka dorbar paidbah yong ka chnong deilang waki waheh wasian yong ka Myngsngat-Khanduli Constituency wei ya kani ka yalang da pynlai da u Chairman chnong yong ka Namdong– A u Jakob Shylla.
U Dawan Lyngdoh hei klam yong oo da khana u yei thmu yong oo wow yakhun ya ka Election MDC ha u snem 2019, deiwa kular hakhmat ki paidbah wa da psiah u cha ka kaam Politic ymtoh wa em u ka spah ka phaw tangwa deiwi i yumut wow chakri ya ka imlang sahlang kawa dang sahdien ha waroh ki liang wei da pynche u leh cha ki paidbah wa ym em kiwon kiwon wa phah ya oo wow yaleh Election tangwa da pyntip u wa da rai nyngkong u samen wei hadien da pyntip u cha kiwa ha yung ha sem wei cha kiwa yahkhmat ka chnong wa cha ka chnong hi waroh kawi.
Kamtæ ha ka yalang da pynsñiaw u cha waroh ka Constituency yei angnood yong oo wow chakri ya ka imlang sahlang wei da kular u leh wow ya krehlang wa ki paidbah wei da kyrpaad u leh ya ki paidbah yong ka Constituency wow e ya i kyrchaan ya oo yow poi cha ka thong yow ye u wanrah yei kylla cha kani ka thaaiñ kawa dang sahdien.
Discussion about this post