Ka Meghalaya da lehbha ko haka sngi nyngkong ka yalehke Ranji Trophy yong ka samoi 2023-24 deiwa pyntam da 109 Run haka Innings wa nyngkong pyrchah yaka Arunachal Pradesh kawa da pynman ha Anand, Gujarat ynne ka sngi.
Ka Arunachal da jop ko yaka kylla khlem wei da jied ko wow Bat nyngkong wei da haap lut ki Wicket ko hapoh 30 Over deiwa kamai 94 Run. Ka Meghalaya won da kamai ko 203/2 na ki 58 Over kat hadooh wa kut ka yalehke.
Kam wow pynkynmoo wa ka Meghalaya Cricket Association da jied ko wow pyn yalehke du da kiwa chong chnong ka jylla khlem da pynemkaam ya ki Guest Professional.
U Md Nafees (1/16) da yoh Wicket u pyn haka Over wa nyngkong wei da man leh du kani ka Wicket ya oo tangwa da pynsdang ko yei haap ki Wicket ka Arunachal deiwa lehbha sa kiwi kiwa kawong bol kam u Dippu Ch Sangma (4/18), u Sanvert Kurkalang (3/19) wa u Swarajeet Das (2/10) iwa man leh iwa lehbha dooh ki ha ka Ranji Trophy.
Hawa bat won, u Arien (32 Run) wa u Swarajeet (29 Run) da sdang ki yei kamai yaka Meghalaya deiwa kamai lang 54 Run neibynta ka Wicket wa nyngkong. Hadien kini da wan u Ram Gurung wa u Kishan Lyngdoh kam u Captain kiwa da kamai 133 Run neibynta ka Wicket wa le hadooh wa kut ka yalehke.
Hadooh wa kut ynne, u Kishan da dat u 12 tylli ki 4 Run wei da kamai u 68 Run na 81 bol katwa u Ram won da yoh u 61 na 115 (8x4s).
Discussion about this post