Ka Meghalaya ynnin da yoh ko wow psiah cha ka Final ka Ranji Trophy 2023-24 Plate Group wei da ini da yoh ko leh wow booh yei thaw hapoh ka Elite Group haka samoi wow wan.
Ka Meghalaya da jop ko yaka Mizoram haka Plate Semi Final ynnin ha Mangaldai, Assam da 6 Wicket deiwa emkaam sa 28 Run. Ka Meghalaya da booh thong yaka 153 yow jop wei chwa ynnin da yoh ki 125/4 haka Innings wa ar heiwa u Captain Kishan Lyngdoh (34 Not Out) wa u Jaskirat Singh Sachdeva (19 Not Out) toh kiwa Bat.
U Kishan wa u Jaskirat da neh ki hadooh wow jop ynnin deiwa chimpor kamwa chiteiñ kynta. U Kishan da yoh u ya ka 50 Run wa soo ha kani ka samoi ka Ranji Trophy deiwa kamai 53 (Not Out) katwa u Jaskirat da yoh u 31 (Not Out).
Kam wow pynkynmoo wa ka Mizoram da Bat nyngkong ko wei da kamai ko 144 heiwa ka Meghalaya da jubab ko da 145. Ka Mizoram won da kamai ko 153 haka Innings wa ar.
Neiliang u MCA President da yaroh u ya kiwa yalehke ka jylla heiwa ha kani ka samoi ym em pynemkaam ya ki Guest Player wei da booh bait yei chaniah ha kiwa pyn napoh ka jylla donhi. Da yaroh u leh ya u Kishan Lyngdoh uwa da sdang pait ka ri yei rukom yalehke u.
Ka Meghalaya daw yachem ko waka Hyderabad ha ka Final kawa daw sdang nadooh ka 17 tarik ha ka thaw kawa daw pynbna hadien. Hawa kini ki liang da yachem nyngkong ki, ka Hyderabad da jop ko ha Shillong da chi Innings wa 81 Run.
Discussion about this post