U Kishan Lyngdoh da yoh u ya ka spah Run wa nyngkong dooh ha ka yalehke First-Class Cricket yong oo ynne katwa u Guest Professional ka Meghalaya, u Punit Bisht da yoh u ya ka 200 Run ha ka yalehke Ranji Trophy pyrchah ya ka Arunachal Pradesh ha Anand, Gujarat.
Hadooh wa kut ka yalehke ynne, ka Meghalaya da yoh ko 424/3 na ki 90 Over.
U Bisht dang ye u wow kamai chooh neibhah dang neh u hadien wa kamai u 205 Run na ki 193 bol. Iwa heh dooh wa kamai u hadooh katni toh 343 Run pyrchah ya ka Sikkim wei ye u wow pyntam yeini mynstep.
U Kishan Lyngdoh ha uni u snem da man ko ka samoi wa ar wa chimbynta u ha ka yalehke First-Class Cricket. Nachwa iwa boon dooh iwa kamai u toh 40 Run ha kani ka kyrdan yalehke iwa da yoh u pyrchah ya ka Mizoram ha u bnai wa dep.
Ynne da yoh u 128 Run na 223 bol wa kynthup ya 17 tylli ki 4 Run. U Kishan Lyngdoh da man u uwa le uwa man kam uwa chong wa sah hapoh Meghalaya uwa da yoh 100 Run ha ka First-Class Cricket hadien u Raj Biswa wa u Dippu Ch Sangma.
U Kishan da kamai lang u 81 Run wa u Raj Biswa hadien wa ka Arunachal da jop ko ya ka kylla-khlem wei da phah Bat nyngkong ya ka Meghalaya. U Biswa da haap u hadien wa kamai u 49 Run wei da wan sa u Swarajeet Das uwa da kamai du 11 Run.
Kamtæ u Kishan wa u Bisht da kamai lang ki 212 Run neibynta ka Wicket wa le heiwa da lehke ki ya kiwa yalehke ka Arunachal.
U Kishan da kamai u deiwa jai-jai katwa u Bisht won da kamai u palat chi Run chi bol deiwa dat leh 35 tylli ki 4 Run wa kawi ka 6 Run.
Hadien wa haap u Kishan, da wan u Tarique Siddique uwa da kamai 21 Run khlem haap yow kamai lang 93 Run neibynta ka Wicket wa soo.
