Uwa yalehke ka Meghalaya, u Dippu Sangma da yoh u 55 Run khlem haap pyrchah ya ka Kerala kawa da jop ya ka yalehke Ranji Trophy Elite Group A da 166 Run ha Rajkot, Gujarat ynne ka sngi.
U Dippu ha ki yalehke First Class da dep u wow yoh 114 Run pyrchah ya ka Mizoram ha Duyatra (Jan) 2020.
Ka Meghalaya ha ka Innings wa ar da rap lehbha ko deiwa yoh 191/10 hawa nujor waka 148/10 ha ka Innings wa nyngkong.
Neiliang u Guest Professional Chirag Khurana da yoh u 75 na 70 bol wa kynthup lang 15 tylli ki 4 Run. Da yoh yarap leh na u Lerry Sangma uwa da dat 4 tylli ki 4 Run yow yoh 19 Run na ki 13 bol katwa u Aryan Bora da pynyoh lok u ya u Dippu deiwa yoh 11 na 24 bol.
Ki 55 Run u Dippu da wan ki na 123 bol deiwa dat leh 8 tylli ki 4 Run.
Hachwa ini ka Kerala da pteiñ ko nei 454/8 heiwa ka 51 Run wa kamai lang u Vishnu Vinod (106 not out) wa uwa jooh yalehka ka India u S Sreesanth (19) da pyntam ko ya ka Kerala palat 500 Run. Hadien wa haap u Sreesanth ha u Bora (3/105) ka Kerala da pynkut noh ko yei kamai deiwa yoh 505/9, iwa mut da tam da 357 Run ya ka Meghalaya.
Ka Meghalaya kattu u yachem ko waka Madhya Pradesh ha ka 24 tarik uni u bnai.
