Shillong: Ka 4th Assam Rifles Invitational Football Tournament kawa sdang ynne ka sngi ha Jawaharlal Nehru Stadium, Shillong da sdang da ka yalehke hapyrdi ka Lawmali SC na Shillong waka Narwan SC na East Jaiñtia Hills.
Ka Lawmali da jop ko da 3-1 wei da yoh ko lai cha Round wa bood.
Da em 16 tylli ki dhab wa chimbynta heiwa kani ka lympung u pynman ya ka hadooh ka 16 tarik uni u bnai kam chibynta wow lehkmen ya ka Assam Rifles’ 184th Raising Day.
Ha kani ka sngi da wan wai ya ka da u Director General ka Assam Rifles u Lt. Gen. Sukhdeep Sangwan, SM**, kam u kongsan uwa pdiang burom ya waroh kiwa wan chimbynta.
Hei klam yong oo da ong u wa man iwa eh bha u klam chaphang ka Football ha kani ka thaaiñ wa maya ya kani ka jait yalehke iwa da pynsakhiat wa dang ha ini wa da dep da sdang ya ka Meghalaya Baby League iwa pynyoo yei chimkhia hapoh ka jylla ya ka yalehke Football wow chem ya i sap kiwa yalehke nadooh wa dang khian.
Hawa kyruiñ won cha ka yalehke kawa man kawa yoosuk bha nadooh wa sdang hadooh wa kut heiwa lada ka Narwan ye ko tne ya ka bol da iwa toh rukom da chem chitom ka Lawmali.
U Shanbor Jyrwa da thap u ya ka kool wa nyngkong ha ka minit wa 11 tangwa nei biang uwa yang kool ka Narwan u Sivel Rymbai da khanglaad ya ka Lawmali wow thap chooh ya ki kool ha ka kylla step.
Ha ka kylla miet haka minit wa 61 u Jyrwa da yoh biang u thap sa chi kool lyngba ka Penalty.
Ka Narwan da yoh ko u thap chi kool lyngba u Diborlang Lamin.
Kiwi de ki dhab wa chimbynta toh ka Smit kawa da jop la ar sien ya kani ka lympung, ka Assam Rifles kawa jop ha u snem 2017, Lawsohtun, Eastern Pirates, Seven Brothers, Sawmer, Kith United, Umphrup, Mawpdang, Madanryting, Nongthymmai, Nongkrem, Mawpat wa Mawkhar.
Mynstep ka Lawsohtun daw yachem ko waka Eastern Pirates heipor 10:30 i step, pynbood won saka Seven Brothers pyrchah ya ka Sawmer heipor 1:30 i sngi kiwa daw pynman ha madan ka Assam Rifles kawa em ha Laitkor.
Discussion about this post