Ki chynrang wa ki kynthai ka Meghalaya da rem ki ha ki yalehke T20 ha ka Syed Mushtaq Ali Trophy waka Senior Women’s T20 Trophy ynne ka sngi, katwa ha ka yalehke wa khaddooh ha ka U-19 Men’s Vinoo Mankad Trophy da kut khlem pyndep neidaw wa hiar slap pyrchah ya ka Rajasthan.
Ha ka Group C ka Men’s T20 Tournament, ka Meghalaya da jop ko ya ka kylla khlem wei da jied ko wow Bat nyngkong pyrchah ya ka Karnataka ha Mullanpur, Punjab heiwa da kamai ye u kamai 89/8 na ki 20 Over. U Lerry Sangma da kamai boon dooh u deiwa yoh 34 na 25 bol deiwa dat ya ar tylli ki 4 run wa ar tylli ki 6 Run. U Yogesh Tiwari da kamai u 22 Run katwa u Raj Biswa won 11 Run.
U Lerry wa u Yogesh da kamai ki 56 Run neibynta ka Wicket wa san tangwa ka Meghalaya da dooh ko soo ngut na ki soo bol.
U Abhishek Kumar (1/15) da yoh Wicket u ha ka Over wa nyngkong dooh hawa sdang ka Karnataka u Bat tangwa u Mayank Agarwal wa u Manish Pandey kiwa waroh ar man ki kam kiwa yalehke ka India da Bat ki hadooh wa pynjop da 9 Wicket. Ka Meghalaya kattu daw yachem ko waka Maharashtra ha kani ka sngi Bibar.
Ha ka Women’s T20 Tournament, ha ka Group A ha Bangalore da hap wow yaleh da mar 5 Over chiliang. Ka Andhra Pradesh da jop ko ya ka kylla khlem wei da phah Bat nyngkong ko ya ka Meghalaya heiwa da yoh ko 21/4. Ka Ajima Sangma (1/7) da yoh Wicket ko ha ka Over wa nyngkong tangwa ka Andhra Pradesh da jop ko deiwa sah sa 2 Over khlem da dooh de ya ki Wicket. Ki kynthai ka Meghalaya kattu daw yachem ki wa ka Odisha ha ka sngi Bibar.
Ha ka Vinoo Mankad Trophy, u slap da pynthut u ha Pune yei sdang ka yalehke hapyrdi ka Meghalaya waka Rajasthan ha ka Group C. Manda ye u sdang, ka Meghalaya da jop ko ya ka kylla khlem wei da jied ko wow kawang bol nyngkong. Ka Rajasthan da ye ko u kamai 87/4 chwa u slap biang sa chisien hadooh wa hap pyndam noh. Soo ngut na kiwa kawang bol ka Meghalaya da ye ki wow yoh Wicket, u Bosrang R Marak (1/11), u Banialam Mylliemngap (1/16), u Bharat Gurung (1/17) wa u Raghav Magotra (1/18).
