Ka lehkmen Behdieñkhlam wa chisien chi snem yong ka Seiñraij Jowai, ha uni u snem u sdang ko nadooh ka 30 tarik uni u bnai wei daw kut ko ha ka 3 tarik u bnai wow wan, kamtæ ynne ka sngi kiwa yahkhmat yong ka raij wa kynthup nadooh u President, u Hercules Toi, u Vice President, u Eddy Murphy Passah, u Asst. General Secretary, u Wyraiki Kharbuki wa u Dolloi ka Elaka Jowai, u Puramon Kynjing hawa klam cha kiwa thoh khubor da khana ki wa i pynkhreh ya ka Behdieñkhlam da lai ko chait chait chakhmat ha ki bynta waphær waphær wa kynthup leh heiyatoh wa ki kaam niam.
Khana ki leh wa ki bor pynlai District ka West Jaiñtia Hills chirup ka chnat Tourism, PHE wa PWD da chimkhia lang ki heiyatoh i pynkhreh ya ka Behdieñkhlam ha jar jiar ki bynta.
Neiliang ki khon ka raij ha ki dong waphær waphær ka Jowai leh da lai ki chakhmat wow pynkhreh ya ka Behdieñkhlam heiwa da sdang kieh leh i sur yong ka bom ha man ki dong ki chnat.
Kamwa i bynta wa kongsan ka Behdieñkhlam toh ha ki 4 sngi 3 yaaw, kamtæ booh haroh ki i kyntu ya ki paidbah ka chnong Jowai wa kiwa wan na baar leh wow ya krehlang ki heiyatoh wa i rukom lai rukom wan kari iwa daw pynbna da ka chnat pulit khnang yow lait u thut i lai i wan, kamjooh leh wow ri ki yei akor salon.
Ha ka sngi pynkut ka 3 tarik, najrong u Montri Rangbah ka sorkar jylla, daw wan sakhi lang leh kiwi won ki kynrem ki lyndang, ki sahep sorkar wa kiwi won wa chah khut sñiawbha.
Heiyatoh wa i pynkhreh ya ka lehniam, u Dolloi ka Elaka Jowai da ong u kamwa ka Behdieñkhlam em ko ya ka yurim pyndep niam neibynta u yoh yei chait i khiah, i roi ka paar wei yow bha ka kamai kajih kamjooh u wanrah yei suk haka imlang sahlang, yooluti u wa i pyndep niam ha uni u snem leh u man ko kawa lai bait lai ryntih kamwa da mih ha ki dak ki chin.
Discussion about this post