Ka Directorate of Revenue Intelligence (DRI) da chem ki ya kiwa chalan tooh ya i ksiar, i rupa wa ka poisa, wei ini waroh wa yoh kem man i Rs. 14.13 klur, da pyntip ka Ministry of Finance.
Ka DRI da ong ko wa kini ki bru chalan tooh ki yei ksiar na baar ri chapoh India wei wow pynpoor won ya ki cha kiwi ki thaw dai da ki rel.
Ha ini i kynreh da kem 8286.81 gram i ksiar iwa chongdor Rs. 13.41 klur, 7350.4 gram i rupa iwa chongdor Rs. 19.67 lak, da kem leh ka poisa India wa Rs. 51,74,100 wei yeini da leh katkam ka Customs Act, 1962.
Yeini i kynreh ka DRI da pynman ko hadien wa yoh ka yutip wa tikna wa em u bru wa wan na Kolkata cha New Delhi Railway Station da ka rel.
Uni u bru da rah u yei ksiar iwa na baar rii heiwa da e kti u ki ha uwi tawon u bru wa yang ha lait ka Station, heiwa da kem noh ya kini ki ar ngut.
Hadien wa phla ki ha ki sahep, ki bru ka DRI da pynman ki yei kynreh ha Delhi heiwa da chem ki ya i thaw saiñ ksiar tooh. Ha ini i thaw da thang yei ksiar iwa na baar ri khnang wow tymplæh yei pyrtuid iwa da chon kamjooh wow lait u tip iwa neiwon ini i ksiar.
Na ini i thaw da chem ya i ksiar, rupa wei da kem ya u Manager wa pynlai ya ka.
Chooh chooh da pynman yei kynreh ha Kolkata, heiwa da chem sa iwi i thaw wa saiñ ksiar wei neini leh da chem ya i ksiar wa dadep thang. Ha ini i thaw da kem leh ya u Manager kamjooh ar ngut kiwa da phla wa kti ki yei ksiar cha Delhi hadien wa tymplæh yei pyrtuid.
Ki heh ka DRI da pyntip ki wa da kem ya 6 ngut ha waroh wei da yah ya ki cha yung bichaar deiwa pynrap wa i takit dang lai i chaphrang wow chem ya kiwi kiwa emkti.
Discussion about this post