Ka Women’s Welfare Organisation ka Seiñraij Jowai ynne ka sngi da lehkmen ko yei dap 25 snem ka Crèche namo ka thaw pait ya ki khonboo wa ki khynnah kawa haap hapoh i pait i pynlai yong Women’s Welfare Organisation wei ha kani ka sngi da emlang u MLA ka Jowai u Wailadmiki Shylla kam u kongsan, chirup u H. Toi, President ka Seiñraij Jowai najrong kiwi ki para dkhot ka Seiñraij, ki bei ki pa yong ki khynnah wa wan booh Crèche, kiwa chah khut sñiawbha wa kiwi.
Hawa klam yahkhmat ka Dr. Wa-I-Sa Sumer, Chairperson Women’s Welfare Organisation da khana ko yei lai luti ka seiñ kynthai deiwa ong wa ka thong wa hakhmat dooh yong ki toh ka Crèche wei da em ki leh ka Playschool kawa da sdang ki ha u snem 2016.
Najrong neitæ da pyrchang leh u kreh chiboon ki bynta haka imlang sahlang deiwa pynman ya ki Awareness Programme, ki Seminar waphær waphær ym du kat ya ki kynthai ki manbei tangwa wot neibynta ki khynroo khyllood.
U Wailadmiki hawa yaroh ya ka seiñ kynthai ka Seiñraij Jowai hajrong i lai luti ko neibynta kani ka Crèche, ong u katwa toh hi ki manbei wa sñiawthooh wei tip bha ki yei eh i khor, da booh ya kam kani ka thaw pait khonboo deilang ki khynnah heipor sngi katwa dang lai khih lai kreh ki bei ki pa yong ki.
Kani da yarap bha ko ya ki manbei manpa neibhah deiwa booh bru wa yang ha ki yung ki sem leh man kawa syad wei saja u yoh bru.
Kamtæ da pyn-eh-bok pyn-eh-nasib u ya kani ka Crèche kamjooh ka Playschool khamtam ya ki bor pait bor pynlai ka Women’s Welfare Organisation ka Seiñraij Jowai wow nang ye chooh chooh ko u e i chakri wa biang tam neibynta i miat i bha wei wow kyntu kynrong ya ki manbei.
Ong haroh u ka jaitbru yong i man ko ka nongmuna ya kiwi tawon ki jaitbru, neibhah ha kiwi ki jaitbru dang katwon hi-eh tipmit pynkupbor ki ya ki kynthai, ki manbei ha ki bynta waphær waphær, tangwa i ka jaitbru Pnar won nadooh u warim wajah da pynkham ki i bor wa khlan tam ha ki kynthai wa ki manbei.
Ha kani ka sngi pyntip u wa neiliang ka sorkar leh da pdiang ko yei kyrpaad ki paidbah wow chna ya ka Hostel wa kyrpang ha Jowai neibynta ki kynthai wa khih wa kreh kiwa hap wan na ki thaw wa jngai yow yoh thaw sah ki.
Neiliang u Wailadmiki ha kani ka sngi da kular haroh u wow yarap Rs. 2 lak lyngba ka MLA Scheme yong oo cha ka Crèche yong ka Women’s Welfare Organisation Seiñraij Jowai.
Ha kani ka sngi ka Women’s Welfare Organisation da e burom haroh ko ya ki 5 ngut kiwa man ki khynnah Crèche wa nyngkong ha ki 25 snem nachwa kiwa da heh da san katni.
Da pynchongchit ya kani ka sngi dei rwai na ki manbei ka Women’s Welfare Organisation wa i chaad na ki khynnah ka Crèche.
Discussion about this post