Ka 4 tarik u Duyatra 2025 da man ko ka sngi wow sah kynmoo ya ka Dorbar Chnong Mynthong, Jowai neibhah wa hadien 31 tylli ki snem i pynphet pynphar ya ki kaam chnong kaam yonglang hapoh ka yung Hall warim, da yoh ko u wai mooyurim yow chna pynheh noh ya ka lyngba i yoh yarap poisa na u MP Rajya Sabha da Rs. 10 lak, na u MLA ka thaaiñ Rs. 10 lak wa na u MDC ka thaaiñ Rs. 1 lak.
Ya uni u mooyurim da wan wow wai leh da u Dr. W.R. Kharlukhi, MP Rajya Sabha kam u kongsan wa u Wailadmiki Shylla, MLA ka Jowai uwa man leh u Chairman ka MUDA, hei emlang u MDC ka thaaiñ, u Lakhon Dkhar, neitæ u Dolloi ka Elaka Jowai, u Puramon Kynjing, u BDO ka Thadlaskeiñ Block, u H. Ñiang, u Chairman ka Jowai Municipal Board, u P. Lyngdoh wa kiwi.
Katkam i pyntip na u waheh chnong, u L. Pohktai, da ong u wa ka mang poisa wow lut neibynta wow chna pynheh ya ka yung Hall katkam wa da pynwandur da khynjoh ko cha ka 1 klur 90 lak tangka, kamwa man kattæ ka poisa wa da yoh yow sdang noh i pynkreh toh Rs. 23 lak deiwa yoh yarap na u MP, u MLA wa u MDC wei da em leh Rs. 2 lak won wa da pynmih da ka chnong.
U Wailadmiki Shylla hawa klam kam u symbood kongsan ong u wa kani ka sngi man leh ka dak i yatylli i yakrehlang nadooh ki warim hadooh kiwa katni deilang waka chnong ka thaw. Wei ymtoh leh u dooh mynsien hanla poi ka mang poisa wow pyndep hadooh 1 klur 90 lak tangka, tangwa toh u kreh chwa kajiak chisien katwa yoh neibhah ymtoh iwa suk wow yoh syndon katkam wa mang.
Kyntu u wow nang lai ki chakhmat yei kreh na ka Rs. 23 lak wa da yoh katwa oo won kam u MLA u nang thooh laad thooh Scheme chooh chooh u deiwa yooluti wa manda lut ka Rs. 23 lak wow yoh biang ki Scheme.
Da pynkynmoo haroh u deiwa ong, kani toh ka yung yonglang wei emkaam u yakrehlang yow kyntu kynrong yaka wa kamjooh leh yaka chnong ka thaw wym toh wow em i sñiaw yaphær neidaw yong yung yong sem, i daw samen namo i sñiaw yaphær Politics.
Deiwa e nongmuna u pyn ya oo hi, wa hadien mar ya kut ka Election thooh laad u kammon u wanrah ki Scheme pynroi hapoh ka Constituency yow myntoi ya warohlang, ym du neibynta kiwa thap Vote donhi cha oo.
Kamtæ yooluti u waroh u em ki ka jooh ka mynsien kam oo hei wow wan ki chakhmat u yakrehlang neibynta u kyntu kynrong ya ka chnong ka thaw waka Constituency.
Khut haroh u i yakrehlang heiyatoh i khooid i jngiar, wa kamwa sdang u snem thymme, u pynthymme leh yei thij i pyrkhat yow pynman yaka chnong kawa khooid wa jngiar.
Neiliang u kongsan, u Dr. W.R. Kharlukhi kam u bru wa da kha da heh da san ha Jowai, kynmoo tamdien u ya ki por wa da lai wa kamjooh leh i maya i kyrchaan wada yoh u naki paidbah ka chnong Jowai, ka Ri-loom Jaiñtia iwa pynman ya oo wow poi hadooh kani ka kyrdan.
Kamtæ i e Scheme won sñiaw u wa toh i kaamram yong oo hi, wei lada dam e u yaka chnong yong oo hi, da man u kam u bru wa khlem sarom tam.
Khana haroh u wa da yaleh u wow yarap yaka chnong ka thaw yong oo katwa ye, hanla hei yoh wa khian iwa Rs. 5 klur donhi ya waroh ka jylla.
Wei katwa ye chwa u kut ka samoi yong oo kam u MP u e bhah u mar kajiak ha ki bynta ka chnong Jowai.
Ha kani ka sngi da yoh leh i rwai pdiang naka Music Committee MSYAC, i khana heiyatoh i lai luti ka chnong na u A. Laloo, Ex-Chairman/Secretary/Adviser wa kiwi.
Discussion about this post