Rs. 22 klur mang ka sorkar wow pynlut neibynta ka Election MDC

Ka sorkar jylla daw wanrah ko ya ki pulit na Garo Hills yow sonteri ya kani ka Election MDC cha ki ar tylli ki Autonomous District Council (KHADC wa JHADC), kawa daw man ha ka 21 tarik uni u bnai khnang wa i jied ya kiwa mihkhmat cha ki District Council daw man ko kawa lai bait lai ryntih.

Hawa pyntip yeini, u Commissioner & Secretary ka chnat District Council Affairs (DCA) yong ka jylla, u Cyril V D Diengdoh (IAS), da khana u wa i pynkhreh neibynta ki bor pulit da yaklam hapyrdi ki Deputy Commissioner wa ki Superintendent of Police yong ki District.

Da khana u wa ka chnat pulit da pyntip da pynkhreh ko wow wanrah ya ki pulit na Ri-loom Garo (Western Range) yow pait ha Khasi wa Jaiñtia Hills District (Eastern Range) neibynta ka Election MDC.

Neiliang u Superintendent of Police ka East Khasi Hills, u Vivek Syiem da khana u wa 5 Platoon ki pulit daw wanrah yow pait ya ka Election MDC.

Related posts

Da pynbna ya ka Result Interview kiwa yaleh kreh Grade IV

May 13, 2025

Khut ka NPYF-Jaiñtia Hills ya ki khynnah wa leh bha ha ki Exam yow chah pynkup burom

May 13, 2025

Ka East Khasi Hills em ko 931 tylli ki thaw thap Vote (Polling Station), wei ki pulit daw em ki ha ki 34 tylli ki Polling Station wa ye u mih kulmar wa 5 tylli ki Polling Station kiwa em hei maa ha East Khasi Hills.

U Vivek da ong u wa ha man ki Polling Station daw pynboon ya ki pulit wa kynthup ki Mobile Patrol, Tactical Patrol, ki thaw wow sylli ya kiwa lai wa wan wa kiwi kiwi de yow pyntikna wa lai bait ka Election.

Hawa yatoh wa ki thaw thap Vote wa ye u em hei maa, u Cyril Diengdoh da ong u wa hajrong ini, ki Deputy Commissioner daw lum khubor ki wei daw phah won cha ka chnat pulit yow leh yeiwa emkaam.

Da ong u wa ki DC da yaklam ki leh wa waroh kiwa embynta wa kynthup ki seiñ saiñpyrthai wa ki waheh chnong wow ya krehlang neibynta ka Election yow man kawa lai ryntih.

Da ong u leh wa toh ka kaamram wow pynlai ya ka Election da ki Deputy Commissioner (DC) wa ki Returning Officer (RO) ha ki District wa ki Sub-Division.

Hawa yatoh wa i pynlut yong ka sorkar neibynta ka Election, da pyntip u wa da booh wow pynlut Rs. 22 klur neibynta ka Election cha waroh ar tylli ki District Council wei ini chong i katkam i emkaam hapoh ki District.