Rs. 25 klur ki kreh pynbna u Sñiawbhalang Dhar ha ka sngi pynkut ya ka Behdieñkhlem ka Seiñraij Ialong

U Sñiawbhalang Dhar, Symbood Montri Rangbah ka sorkar jylla, ynne ka sngi hawa lai sakhi kam u kongsan ya ka lehniam pynkut ya ka chaad niam Behdieñkhlam ka Seiñraij Ialong, da pynbna paidbah haroh u wa dadep mang kamwa Rs. 25 klur haroh ki kaam pynroi neibynta ki kreh waphær waphær ha waroh kawi ka chnong Ialong, wei ini u kynthup haroh neibynta wow chna pynbha pynmiat ya ka Syiem Aitnar.

Yei kreh ym slem de u sdang ki, wei yooluti u wa ha u snem wow wan kani ka Aitnar daw kylla dur ko wei daw man ko leh kawa yoosuk.

Da khana u wa ya kani ka poisa wa da mang toh hadien wa ka chnong Ialong dadep e kti dorkhat ko ha u Montri Rangbah ka jylla, u Conrad Sangma ynnin u snem heipor wa wan yooh kjat u wow sakhi ya kani ka Behdieñkhlam.

Ha kani ka sngi pynkut ya ka Behdeiñkhlam ka Seiñraij Ialong da wan emlang leh u Shitlang Pale, MLA warim ka Sutnga Saipung Constituency, u Dolloi ka Elaka Jowai, u Puramon Kynjing, u President ka Seiñraij Jowai, u H. Toi, ki khlieh yahkhmat Seiñraij wa Ñiamtre waphær waphær, najrong kiwa chah khut sñiawbha.

Heiyatoh wa ka lehniam Behdeiñkhlam, u President ka Seiñraij Ialong, u Pyrkhat Shylla da khana u wa ka lehniam da sdang nadooh ka 4 tarik wei da pynkut ynne ka 12 tarik hajrong ka yurim u beh ya ka khlam, i kjut chitom wa i sih wa boonjait haka imlang sahlang, najrong wow bha i rep i riang wei wow ku ka puræ puthi.

Ha kani ka Behdeiñkhlam ka Seiñraij Ialong da chimbynta lang ka Raij Wahiajer, Raij Nongkhyllep wei waroh ki dong wa em hapoh ka chnong Ialong.

Lyngba ki rot ki rong wa da wanrah hapoh ka Syiem Aitnar da ki khon ka Seiñraij Ialong da emlang ki waka Wyrta cha ka imlang sahlang.

Heiyatoh wa ki niam wa jooh yoh bynta lang ki kynthai wa chynrang hapoh chnong Ialong, u Pyrkhat Shylla da khana u wa hapoh ka Raij Ialong em artylli ki lehniam kawi toh ka Chaad Sukra deilang ka Nohsakyriat wa ka Behdieñkhlam. Ha ka Behdieñkhlam da chimbynta u chaad du ki chynrang katwa ki kynthai won man ki kiwa pynphooh pynphieñ.

Katwa ha ka Chaad Sukra wa Nohsakyriat kawa jooh pynman ha u bnai April won da chimbynta du da ki kynthai donhi.