Rs. 3 lak ka kuna u toh kiwa booh ya ki phlim ha Internet khlem da yoh bor

Neidaw wa kiwa chna phlim dooh nong ki hadooh Rs. 20,000 klur chi snem hapoh ka ri India neiwa leh Piracy namo kiwa pynlai yaaw tooh ya ki phlim wa kiwa pynoo khlem da yoh bor, neiliang ka Ministry of Information and Broadcasting da pyntip ko wa da dep ko wow chim ki laad ki luti wow khang yeini hapoh ka ri. Wei hadien wa ka Parliament da mynjur wow pynkylla ya ka aiñ Cinematograph (Amendment) Act, 1952 ha ka dorbar wa dang dep pynman, neiliang ka Ministry of Information and Broadcasting da thung ko da ki Nodal Officer yow pdiang ya ki ujor wei kini won daw kitkhlieh ki wow lai pyntip cha ki rynsan Digital Platform kiwa pynyoo ya kini ki phlim ha ki Website ki App wa kiwi kiwi.

Kamwa man kattæ ym em ka chnat wow pynchitom ya kitu kiwa pynlai yaaw wei pynyoo tooh ya ki phlim lait noh hapoh ka aiñ Copyright Act wa IPC. Tangwa neidaw won wa em ka Internet katni wei kiwa boon da sdang ki wow pynemkaam yaka Internet yow pait mynkna ya ki phlim, kiwa leh kamni daw chah pynchitom ki wut wut ha ka Ministry of Information and Broadcasting.

U Montri kani ka chnat, u Anurag Thakur da ong u wa deiwa pynkylla ya kani ka aiñ da thung ya kini ki sahep namo ki Nodal Officer hapoh ka Ministry of I&B wa ha ki yung krehkaam ka Central Board of Film Certification, ha Headquarter ha Mumbai wa ha ki Regional Office. Kamtæ da ong u wa kani ka aiñ toh kawa da dawa da slem da kiwa chna phlim wei i thung ya kini ki Nodal Officer toh kam chibynta wow yarap ya ki.

Kani ka aiñ toh kawa da pynkylla hadien 40 snem yow man ko kawa yahaap waka juk wa katni deiwa kynthup lang yaka Digital Piracy wei iwa khaddooh wa da pynkylla ya kani ka aiñ toh ha u snem 1984. Da ini i pynkylla, kitu kiwa chem wa leh pyrchah ya kani ka aiñ u chah kset ki ym duna ya 3 bnai deilang waka kuna wa Rs. 3 lak wei ye leh wow chah kset hadooh 3 snem wei ka kuna ye ko leh wow man hadooh 5% iwa lut wow chna ya ka phlim.

Related posts

Yoh pynlait ya ka kynthai kawa na East Jaiñtia wa chah kset yabor ha Delhi

May 11, 2025

Yoh kem mooyong hadooh 6000 MT ha East Jaiñtia Hills

May 10, 2025

Kamtæ deiwa dep pynkylla ya kani ka aiñ kiwon kiwon kiwa man kam ki tre ki phlim ye ki wow lai ujor cha ki Nodal Officer yow phah ya ki tre Website/App wa kiwi wow pyndam noh ki ya kini ki phlim.

Hadien wa pyntip u Nodal Officer cha kini ki Digital Platform, hap ki wow pyndooh noh ya ka Link wei wow pynwiar noh ya ka phlim hapoh 48 kynta.