U MLA ka North Shillong, u Adelbert Nongrum da wanrah u da ka “Zero Hour Notice” hapoh ka yung dorbar chna aiñ ynne ka sngi yow kylli neiwon yoh poisa ka sorkar wow pynman ya ka tamasa Cherry Blossom Festival 2023 neibhah wot ha ka mang poisa ka sorkar yong uni u snem da khana donhi wa daw pynman ya kani ka tamasa tangwa ym em won da ong ong neiwon u yoh ya kani ka poisa.
Chooh chooh da ong u wa ha kani ka dorbar wa katni ym em iwon iwon i paan poisa (Supplementary Demand) yow pynman ya kani ka Cherry Blossom kawa man leh ka tamasa wa heh dooh wa pynman da ka sorkar wei ha u Naichphaw daw pynman ya kiwa boon ki tamasa hapoh India wa ha Thailand kiwa dei mynkna ya ki paidbah yow khriñ ya ki wow wan ha ka sngi wa pynman ya kani ka tamasa.
Heijooh i por da ong u wa ymtoh wa pyrchah u ya ini waroh tangwa kwah donhi wow tip neiwon yoh poisa ka sorkar.
U Paul Lyngdoh uwa man kam u Montri ka chnat Tourism hawa e yei jubab hajrong ini da pyntip u wa kam chibynta kani ka tamasa daw pynman chwa ya ka Road to Cherry Blossom Festival ha India wa ha Thailand nadooh ka 1 tarik hadooh ka 30 tarik u Naichiphaw uni u snem wei ya ka Cherry Blossom Mega Music Contest daw pynman ha ka 17 tarik u Khonchonglad (Nov).
Da ong u wa kam kini ki tamasa, e rynsan ki ya ki kiwa rwai wa tem ka jylla yong i yow pynyoo yei sep yong ki ryngkat wa kiwi kiwa pawnaam hapoh pyrthai wei man ko leh ka laad ya kiwa uiñke suwari wow maad ki yei mahajon ka riti dustur yong i wei heijooh i por leh pynpawnaam ko yei pyrtuid ka jylla Meghalaya hapoh ka pyrthai.
Da e nongmuna u yei leh kiwi ki sorkar jylla wow pynman ya ki tamasa yow pynku ya ki kaam uiñke suwari kamwa pynman ya ka Hornbill Festival ha Nagaland waka Sunburn Festival ha Goa.
Ha uni u snem kam chibynta ka Cherry Blossom Festival daw pynman leh ya ka yakob rwai Choir. “Ym ye u len yei krehkaam kani ka tamasa neibhah hei sien wa khaddooh wa pynman ya ka ha u snem 2021 da em hadooh 45,000 ngut kiwa wan heiwa 30% na kini toh kiwa wan uiñke suwari iwa mut da wan 10,000 ngut kiwa uiñke suwari ha ki 3 sngi,” da khana u Paul.
Ha ka Me.Gong Festival ha Garo Hills da em hadooh 3.5 lak ngut kiwa wan wei ha u snem 2022 won kiwa boon ki Ticket toh kiwa thied da kiwa uiñke suwari wei waroh ki thaw sah leh da dap lut ki wei kani da yarap ko wow pynyoh kamai ya kiwa em Hotel, da yoh laad leh ki bru wow dai ya ki mar yong ki wei kiwa kamai kari leh da yoh khih bha ki.
Da pynche u leh wa kini ki tamasa ymtoh kiwa pynlut poisa waroh da ka sorkar tangwa kiwa da yoh poisa leh deiwa dai Ticket wa ki Sponsorship na ki Company deiwa e nongmuna u wa ynnin u snem du na ka bai Ticket da yoh Rs. 1.25 klur wei da yoh ya ka Sponsorship kawa Rs. 1 klur.
Ha uni u snem da yooluti wow yoh Rs. 2 klur du na ka bai Ticket wei i pynman ya kiwi ki tamasa neibynta kani ka Cherry Blossom Festival ha India wa cha baar ri toh yow pynku yeiwa ye u dai Ticket.
U Paul da pynche u leh wa ka poisa kawa Rs. 7.5 klur yow pynman ya ki tamasa toh kawa da dep kdaw hapoh ka “Expenditure Head 104-Promotion & Publicity of Festival” kawa da yoh yei mynjur hapoh ka dorbar mang tyngka yong uni u snem wei kani da man ko kawa da dap yow pynman ya kani ka tamasa wei ym emkaam de u paan poisa chooh chooh namo ka Supplementary Demand hapoh ka yung dorbar.
Da pynche chooh u wa du wow pynman ya kani ka tamasa da booh bhah ka poisa kawa Rs. 1.99 klur wei kawa da antaad won wa daw hap lut toh Rs. 8.49 klur iwa mut wa poisa wa tam kawa T. 6.99 klur daw pynmih biang ka deiwa dai Ticket wa lyngba ki Corporate Sponsorship.
Discussion about this post