Hawa yaklam wa ki laad pathai khubor ynne ka sngi, neiliang u DHS u Dr. A. War hei emlang leh u montri i chait i khiah u AL Hek wa kiwa pynlai yaka NEIGRIHMS, da kyntu u yaki paidbah wym toh wow khanglaad ya ki wakreh ha ki kaam wa yatoh wa i khiah wow liwan yung ki.
Da ong u wa kiwa da chah wow liwan toh kiwa da pyntikna wa ym em ki hei maa heiwa ka NEIGRIHMS da chimkhia ko ya ki wakreh yong ka chwa wow chah u liwan yung ki wei toh kiwa ym em chah ktah ha u COVID-19 namo kiwa em hei maa wa ye u yoh.
Da ong u leh wa lada ym chah ki chnong ki thaw wow liwan ki wakreh, iyi wow jia ya ka kaam sumaar sukher hapoh ka jylla, deiwa pynrap leh wa kiwa yahkhmat ka chnong, ki tre yung wa ym toh u pyntieñ ware ya ki bru lane wow paitkhmat yaki bru ka chnat i chait i khiah.
U Director ka NEIGRIHMS da pyntip u leh wa ym booh ki hei maa yaki paidbah deiwa phah liwan yaki bru wa ye u em ya u COVID-19 wei da leh ki ya waroh kiwa emkaam katkam ki kyndon, wei da e leh yaka Certificate cha ki wakreh kiwa liwan wow pynsakhait wa man ki kiwa ym em chah ktah lane kiwa em hei maa na u COVID-19.
Neiliang u Hek da pynsñiaw u yei sñiawngooh ya ka dorbar chnong Mawkasiang waka Mawdiangdiang kiwa da tyrwa wa chah ki ya ki wakreh ka NEIGRIHMS wow sah ki hapoh ka chnong ka thaw yong ki.
Da pyntip u leh wa kiwa dang em ya u COVID-19 hapoh ka jylla da em ki 271 ngut hadooh ynne i janmiet.
Ynne da em 12 ngut kiwa yoh hapoh ka jylla heiwa 10 ngut toh kiwa na BSF wa kiwa sah toh ha NEIGRIHMS.
Ha East Khasi Hills kiwa em ya u COVID-19 da em ki 236 ngut heiwa 182 ngut toh ki BSF, 2 ngut ki Air Force wa kiwi toh 52 ngut.
Ha Ri-Bhoi da em 20 ngut, ha East Jaiñtia Hills 2 ngut, ha West Garo Hills 9 ngut, ha South Garo Hills 2 ngut, ha East Garo Hills 1 wa ha North Garo Hills 1. Kiwa chait da em ki 46 ngut.
Update
Heipor wa pynbna u Hek ym pu em kheiñlang wa kiwa dang pynbna na NEIGRIHMS wei wa ki 6 ngut na kani ka thaw sumaar da poi kiwa dang em ya u COVID-19 cha ka 277 ngut wei kiwa dang yoh da ku cha 18 ngut ynne ka sngi.
