U DS War uwa man u Organising Secretary ka FKJGP Jaiñtia Hills da pteiñ u wow e yarap chooh chooh sa cha ki 15 ngut kiwa em hei duna i doh i pran (People With Disabilities) haka chnong Namdong-B, West Jaiñtia Hills.
Ha chwa wow e yarap da u khoo da em chwa ka yalang wa tbian wa da pynlai da u Nidalamshwa Rymbai uwa man u COVID-19 Health Volunteer yong ka FKJGP Thadlaskein Circle.
Ha kani ka sngi da synran ya kiwa duna hei doh i pran da u Asst. Waheh Chnong u Chanbor War wei ha i klam yong oo da pynsñiaw u yei kmen wa i sñiawngooh wa khroo ya uwa yahkhmat ka FKJGP wa da chynna jngai u wow yarap ya kini ki bru ki wym ye u lai khih lai kreh kiwa da yoh yeini i yarap kamjooh yaka yung ka sem ka yong ki. Da yoh leh yei klam na u Pius Ksoo u waheh chnong warim ka Namdong-B.
Neiliang won uwi na kiwa em hei duna hei doh i pran u Khlainbor Phanbuh hei klam yong oo da khana u wa nadooh dang khian u hadooh katni ka sngi wa da jan dap u 58 snem ym jooh em u yoh yarap u neiliang yong ka sorkar wei wa da jooh lai yachem u leh wa ka yung krehkaam ka Social Welfare tangwa ym jooh yoh yarap u. Katwa kamtæ e u i khublei wa i sñiawngooh kawa khroo ya u DS War wa da wan yarap u yaki ynne ka sngi khamtam ha kam kini ki por heiwa da man sakhiat ko i kyrkhu yaki.
U DS War hei klam yong oo da kitbok kit rwiang u yaki yow yoh ki dei chait dei nang deiwa ong u leh hakhmat yong ki wa lada emkaam ki iwon iwon i yarap hei wow lai yachem waka sorkar lane kiwon kiwon ki chnat sorkar, oo smat u wow yarap yaki.
Discussion about this post