U DS War uwa man leh u Organising Secretary ka Fedaration of Khasi Jaintia and Garo People (FKJGP) Jaintia Hills, da lai e yarap u da u khoo yaki 16 ngut kiwa em i duna ha i doh i pran (People With Disabilities) haka chnong Namdong-A Thadlaskein Block.
Ha kani ka sngi da ya emlang u waheh chnong u Arki Sumer, wa ki bru rangbah kam u Elais S Susngi u waheh Raij Namdong, u Lambor lyngdoh, u Karlic Siangshai, President Seng Rangbah Namdong Parish, Fr. Dominic Kympad, Asst. Parish Priest Namdong Parish, waki COVID-19 Health Volunteer yong ka FKJGP-Thadlaskein Circle ha i yahkhmat u Nidalamshwa Rymbai.
Ha kani ka sngi da em leh ka yalang wa tbian kawa pynlai da u waheh chnong uwa da e khublei yaki rangbah kiwa emlang heini wa i sñiawngooh khamtam ya u Organising Secretary ka FKJGP-Jaintia Hills wa da hun u wow pynlut heiwa da thied u ya u khoo wei da e kyllooid mynsien u ya uni u khoo cha ki khon yong ka chnong kiwa em hei duna ha i doh i pran.
Neiliang u DS War da ong u i e ya uni u khoo wym toh u dap u baam da ki snem tangwa kam i yarap donhi kam ini i por wa em kani ka Lockdown wei da e u leh ya i batai kajiak chaphang uni u khniang COVID-19 yow bood yaki kyndon wa da phah daka sorkar neibhah i dawai iwa ye u pynbha u pynyap ya uni u khniang toh du da iwa pyn yajngai iwi na iwi (Social Distancing) wei wow sait khooid leh yaki kti wa ym hoi u lai klumar na kawi ka chnong cha kawi tawan. Da e u yaka kitbok kitrwiang ya waroh wow yoh ki yei chait i nang.
Chwa wow pynkut yow saam ya u khoo da yoh ya i duwai yow lait na kani ka kjut kawa da pynyap ya kiwa boon wa i kyrkhu kyrdoh na u Fr. Dominic Kympad, Asst. Parish Priest yong ka Namdong Parish.
Discussion about this post