Ha jylla Meghalaya ynne ka sngi da em sa 2 ngut kiwa da chait na u COVID-19 kiwa chah sumaar ha Tura Civil Hospital, West Garo Hills District.
Wa kini kiwa da chait hapoh kani ka District, da em kattu sa 1 wa dang em ya u COVID-19.
Hapoh ka jyllwa won waroh kiwa da chait da em ki 28 ngut katwa kiwa dang em ya uni u khñiang da em ki 15 ngut.
Neiliang u DHS u Dr. A. War da pyntip u wa hadooh ynne ka sngi, ki Sample wa da dep Test da em ki 14,188 tylli, kiwa ym em chah ktah ha u COVID-19 da em ki 13,649 tylli wei dang yang yaka Result yong ki 495 ngut.
Da pyntip u leh wa kawi ka kynthai wa da Test Positive ya u COVID-19 ha Ampata iwa em khappood waka Asaam wa kani ka bru toh kawa chah sumaar chwa ha Assam wei da Test leh yaka ya u COVID-19 tangwa da yoh ya i Result du hadien wa da yoh ko wow mih na Hospital wei da liwan yung ko. Kamtæ neidaw wa da Test yaka ha Assam da kheiñ yaka kam kawa yoh COVID-19 ka Assam han la sah ko leh ha i liang ka Meghalaya.
Heiyatoh wa i rukom sumaar da ong u wa ya kiwa yoh COVID-19 kiwa ym em chitom da pynchong donhi yaki samen wei da e dawai Vitamin katwa ya kitu kiwa chitom da e dawai yaki katkam wa chitom ki wa lada iñdoh da e ya i dawai iñdoh.
Ya kiwa da chait won da chah wow liwan ki cha yung yow leh biang yaka Quarantine wa 14 sngi.
Ha iwi tawon i liang da pyntip u leh wa kiwa liwan na baar jylla hadooh ynne i sngi da em ki 15,730 ngut.
