I thmu wow pynheh noh ya ka Shillong Airport wa em ha Umroi ye ko wow chimpor kamwa le snem hadooh wa ki lieñsuiñ kiwa rap heh u ye ki u hiar wei wow hær na ka.
Hawa yaklam wa u Symbood Montri Rangbah ka jylla uwa pait leh ya ka chnat Transport, u Sniawbhalang Dhar, da pynsñiaw u wa ini i thmu wow pynheh ya ka Shillong Airport ye ko wow chimpor hadooh le snem wow pyndep.
Da khana u wa ki Deputy Commissioner da nang lai ki chakhmat neibynta wow tipmit yei thaw wa emkaam wow yoh neibynta wow pynheh ya kani ka Airport.
Hawa kylli, u Sniawbhalang da ong wa emkaam i thaw wa kamwa 22-23 Acre wei mar ya yoh yei thaw daw pyrchang wow kreh noh yow pyndep yei kreh hapoh 3 snem.
Hawa kylli, u Symbood Montri Rangbah da ong u, “Ha nga hi, nga kwah O mynstep mankawi wow pyndep, tangwa i yong sakhiat i rukom krehkaam toh iwa chimpor. I thied thaw, i pynkhreh ya ka DPR, ka mang tangka, i e kti yei kaam wei boon kiyi kiyi kiwa hap wow leh, kamtæ hapoh le snem da toh wow pyndep, hanla kattæ leh u pyrchang hi wow pyndep rap smat neibhah daw man ko i myntoi ya ki bru yong i hi”.
I thmu wow pynheh noh ya ka Shillong Airport toh hadien wa ka Airport Authority of India (AAI) da e ko ya ka Report wa ar wa ye hi u pynheh ya kani ka thaw hiar ki lieñsuiñ.
Hawa lai pait ha u Naikhynde u snem wa daep, da pyntip wa i pynheh ya kani ka Airport toh cheiliang cha tre (South) wei da emkaam chooh chooh yei thaw wa heh 16 Acre neibynta ini, katwa 6 Acre won i thaw wa emkaam yow pynyieñ ya ki lieָsuiñ, wei neibynta ka sarok ‘Runway’ dang emkaam sa 900 Meter wow pynjrong neibynta wow ye u wan ki lieñsuiñ wa rap heh.
Discussion about this post