Kiwa yoh COVID-19 ha Meghalaya da em ki 28 ngut ynne ka sngi kiwa man deilang waki 19 ngut ki BSF (na EKH) kiwa da pynbna chwa ynne i step wei da em sa 9 ngut kiwa dang pyntikna wa dang yoh, da pyntip u montri i chait i khiah u AL Hek.
Da pyntip u wa ki 9 ngut toh ki bru chiphai (Armed Forces) kiwa ym toh ki BSF kiwa 6 ngut na East Khasi Hills wa 3 ngut na Ri-Bhoi.
Ha East Khasi Hills da em waroh 261 ngut kiwa dang em ya u COVID-19 heiwa na kini, 198 ngut toh ki BSF, kiwa na Air Force da em ki 14 ngut wa 49 ngut ki bru paidbah.
Ha Ri-Bhoi da em 22 ngut, ha East Jaiñtia Hills 2 ngut, West Garo Hills 8 ngut, South Garo Hills 2 ngut, East Garo Hills 1 wa North Garo Hills 1. Iwa da poi waroh kiwa dang em ya uni u khñiang 297 ngut.
Ynne da em leh uwi u BSF uwa da chait uwa chah sumaar ha Tura, West Garo Hills iwa da man 47 ngut kiwa da chait.
Ki Sample wa da Test hadooh ynne ka sngi toh 25,263 tylli wei dang yang yaka Result ki 320 tylli heiwa kiwa man Negative da em ki 24,597 tylli.
Waroh kiwa da yoh wa kynthup ya kiwa da chait, kiwa yap wa kiwa dang em ya uni u khñiang da em ki 346 ngut.
