Ka Jowai Municipal Board (JMB) da pteiñ ko yei kaam wow noh jhep kat chawa yoh nadooh wa mih i pyrchah wow noh jhep ha Moochutsdai heiwa dang ynnin da chem da kiwa chong chnong ka Wapung Shnong yei jhep wa da wan noh hapoh ka chnong ka thaw katwa ynne won da chem da ka 5-Shnong Welfare Association yei noh yei jhep charood sarok wa cha rood ka um ka wah.
Neiliang ka San Shnong-Tyrnit Pdeiñ, Mukhaialong, Pynthorsale, Mutong, Cham Cham, Lumshymit da lai ujor ki cha u DC ka East Jaiñtia Hills deiwa phah lang ya ka ujor cha u DC ka West Jaiñtia Hills, cha u MLA ka Khliehriat, MDC ka Tuber, u MLA ka Jowai wa cha u Chairman ka Jowai Municipal Board yeini i leh ka Municipal.
Ka 5-Shnong da pynsñiaw ko yei pyrchah yeini i noh jhep kulmar ka JMB harood u sarok Mukhaialong-Lumshyrmit ha i thaw wa tip kam i Mynkhiat wa ha Liar Wahdooid Myrthe kiwa haap hapoh ka East Jaiñtia Hills District.
Da pyntip wa ya ini i jhep da wan noh hei miet ka 25 tarik uni u bnai deiwa ong wa ini i jhep dapoi ki chadooh ka wahdooid wei da booh hei maa ya ka rymaw waroh kawi, kiwa chong chnong marjan wa kiwa wan wa lai luti neibhah kani ka thaw toh kawa man kam ka thaw uiñke suwari wa ka-it bha ki bru wei ini i sma na i jhep wa noh ka Municipal daw ktah ko ya ini waroh.
Chooh chooh da pyntip wa ka JMB ym em yoh bor ko na kiwon kiwon ki bor chnong wow leh yeini kamtæ da kyrpaad ya u DC wow phah ya ka Municipal ka Jowai wow lai kit wut wut ya ini i jhep lym kamtæ daw lai da kawi ka luti.
