Ka seiñ Khasi Jaiñtia National Union (KJNU) hadien wa ini wa dep da ujor FIR ko ha u SP ka West Jaiñtia Hills pyrchah ya ki pulit wa em haka Check Gate wa em ha u sarok Jowai By-Pass ha thaaiñ Mukhla-Thadlaskeiñ, ynne ka sngi won da ujor FIR ko hajrong i jooh i kaam wa khrong poisa ki pulit heiwa ya kani ka FIR da e cha u Director General of Police (DGP), Meghalaya.
Haka FIR da ong wa neidaw wa u SP ym bien u wow leh iyi iyi leh ya ini i khrong poisa wa pyrchah yaka aiñ da ki pulit kamtæ da hap wow lai rah ya kani ka kaam hakhmat u DGP deiwa ong leh ini i wym leh iyi iyi, pynyoo ko em i ya krehlang ki pulit wa ki bru wa phah wow khrong poisa ha kani ka Check Point iwa da wanrah yei pynsih dur yei pyrtuid ki pulit ha khmat ki paidbah.
Da ong leh wa ki pulit kiwa toh u pait yaka aiñ yow pynchitom ya kiwa leh pyrchah yaka aiñ kat u yoo wa kini ki pulit wa em ha kani ka Check Gate da leh ki mar pyrchah ya ini deiwa tooh yaka poisa paidbah.
Kamtæ da kyntu wow chimkhia ya kani ka kaam wei wow pynchitom ya kiwa emkti.
Puræ leh: Ujor FIR ka KJNU ha u SP pyrchah yei khrong poisa ha u Jowai By-pass
