Hadien wa da kut ka 3 bnai i e por ka JHADC ya ki Seiñ Kur waphær waphær wa haap hapoh u pood u ang yong ka Council yow pynpsiah pyrtuid hapoh ka JHADC khnang wow tipmit noh ya ki da ka aiñ, ynne ka sngi ka Dorbar Ki Waheh Kur Ri Jaiñtia da paan por ko na ka JHADC sa chi bnai khnang wa kitu ki kur wym pu dep pynpsiah pyrtuid u yoh ki u leh yeini kat hadooh ka 07-11-2024.
Kani ka rai wow paan por biang da mih na ka yalang ka Dorbar Ki Waheh Kur Ri Jaiñtia wa da pynman ha ka 5 tarik uni u bani hajrong ini wei da lai e ki dei thoh cha ka Secretary ka Executive Committee, JHADC ynne.
U Khroo Lamsalanki Pariat, President ka Dorbar Ki Waheh Kur Ri Jaiñtia hawa klam wa kiwa toh khubor hadien wa dadep u wow lai e ya ka chithi, da ong u wa i daw wa ki kyrpaad ki wow e por sa chi bnai toh neidaw wa dang em ki kur wym pu dep pynpsiah pyrtuid.
Da ong wa hei yong sakhit hi, kam kiwa yahkhmat ka Dorbar Ki Waheh Kur Ri Jaiñtia da jhan bha ki wa ki kur u wan pynpshiah pyrtuid ki yow ye u pyndep smat yei kaam, neibhah neiliang ka yung krehkaam u Deputy Commissioner ka East wa West Jaiñtia Hills District kiwa toh u e Schedule Tribe Certificate cha ki paidbah leh da lynga ki neibhah wym pu tipmit da ka aiñ ya ki kur hapoh Ri-loom Jaiñtia.
Kamtæ kyntu u ya ki kur wym pu dep pynpsiah pyrtuid wow pynsmat noh ki u pynpsiah ya ka Seiñ Kur ki kamjooh kiwa yahkhmat yong ka Kur yong ki, wei ya kitu ki wym bien won u pynpsiah leh wow sñiawbha ki u phah dei thoh cha ka JHADC.
Discussion about this post