Ka seiñ VPP da pynsñiaw ko yei sñiaw diaw wa joor yei kam wei klam thok ki kattu katni kiwa yahkhmat ka NPP wa deiwa pynkylla yei bhah thung kreh daw wanrah yei kynaad jaitbru ha ka jylla, wei kam ini i klam thok da pynpohdor i ya ka jaitbru Garo kam kiwa kwah du wow yachoh yadat wei kiwa khlem yurim. Kamtæ da beiñ joor ya ini i rukom klam kiwa yahkhmat ka seiñ NPP kiwa da kwah leh wa ki Khasi wym toh u pynemkaam yei bor pyrkhat wei wow suki hi-eh kamjooh wow ngait bait kat iwa rai ka sorkar MDA wa yahkhmat da ka NPP.
Da pynche wa ka VPP burom bha ko ya ki Garo kam ki bru wa stat u pyrkhat wei da pynchlur leh ya ki wow pyrchah ki ya iwon iwon i rai wa bakla ka sorkar deiwa em i mynsien wa yatoh kam chi payu para.
Ka VPP da kop ko lada em kiwa ye u ong wa bakla ka Party neibhah ka rai wa da chim ha ka 12-01-1972 da klam che wa ka bhah kreh namo ka Reservation Policy toh u man ko katkam i boon ki bru wei ka yukheiñ wa da chim ha itu i por toh deiwa antaad donhi ymtoh katkam ka Census. Kamtæ i dawa ka VPP toh wow kheiñ katkam i em sakhiat ki bru wei kiwa pyrchah yeini toh du kiwa dang biej, ki wym tip u pyrkhat wei em ka thong wow pyndooh yei hok ki Khasi-Jaiñtia.
Chooh chooh da ong wa ya ka Job Reservation Policy wa da wanrah ka VPP wow yaklam ymtoh ka buit neibynta ka MDC Election wei lada ymye kitu wow pdiang hawa wanrah ya ka phang wa emkaam, itæ chong ha ki samen samen. Wei lada kitu kiwa em hei bor ymye ki wow leh yei kaam yong ki, bha u hiar chuki noh ki. Da pynche leh wa ka VPP ymtoh du ka seiñ saiñ pyrthai tangwa ka yakhih paidbah wow pynim biang, pynbha biang wei wow pynkylla dur ya ka jylla Meghalaya wei ymtoh deiwa pynbiej paidbah deiwa pynemkaam dei bor poisa chwa ka Election.
Da pynche leh wa ha ka 19 tarik uni u bnai da khut ya ka VPP da ka sorkar wow yaklam hajrong ka Roster System tangwa da man ko du i pynche yei pynkrehkaam ya ka Roster System deiwa pyndap ya iwa da dooh bhah nadooh u snem 1972. Wei hajrong ini da pynman ya ka VPP wow mih noh ko na kani ka yalang neibhah wym chah wow yaklam u pynkylla ya ka Reservation Policy.
Da pynsñiaw leh yei khyrngiat wa da em kawa ymtip iyi mut hawa ong ka “Party” kawa ymem burom ya ki bru wa mihkhmat wa da phah ka Party wa kynthup ya u Vice President, General Secretary wa u Spokesperson neidaw wym em ki MLA ka Party. Kamtæ da ong wa ka VPP ymtoh kam kiwi ki Party wa du ki MLA wa ki Montri wa embor katwa kiwi won ym em bor ki neibhah ki leh em ki i bynta wa emkaam.
