U Director of Health Services (MI), u Dr. Aman Warr da pyntip u wa na ki 5 ngut wa da pynbna ynnin i miet wa da chah ktah ki ha u jait Omicron yong u COVID-19, ynne ka sngi da em sa du uwi donhi wa dang chah ktah.
Katkam wa ong u DHS, uwi na kiwa da chah ktah toh u khynnah wa dang 13 snem uwa wan na Assam ha ka 21 Kmaichonglad (Dec), wei da booh thaw wow lai sah ki ha kawi ka Guest House ha Langkyrding, tangwa uni u khynnah da liwan noh u wa ka bei wow pa khlem poi cha Guest House ha katai ka jooh ka sngi cha Assam neidaw ki kaam wa jhan wei ya kani ka Case da pyntip noh cha ki bor wa pait yong ka sorkar Assam hadien wa da yoh ya ka Report yong ka Genome Sequencing wa toh da u Omicron.
Heiyatoh won wa ki 2 ngut kiwa da chah ktah ha ka chnong Saiden, Ri-Bhoi District, u DHS da ong u wa kini waroh ar ngut da chait ki neibhah wa dadep chong kyrpang chwa ki nadooh wa chah ktah ki ha ka 24 Kmaichonglad.
Hawa kylli da ong u wa boi kini ki ar ngut da chah ktah ki heipor wa lai khawai sñiawbha ki.
Heiyatoh wa uwa chah ktah na Happy Valley, u DHS da ong u wa uni u bru da chait u heiwa da kyrriah cha ka Corona Care Center, wei da wan u na Qatar uwa da chem wa chah ktah u ha ka 29 Kmaichonglad, katwa uwi won uwa na Laitumkhrah ympu lait u na u Omicron, tangwa man u uwa khlan.
