Sa ha East Jaiñtia chah kyntait i phiah ya ki Constituency ka JHADC

Ynne ka sngi ka Delimitation Committee yow phiah ya ki MDC Constituency ka JHADC da pynman ko ya ka pynsñiaw paidbah (Public Hearing) ya ki 10 Constituency ka East Jaiñtia Hills kiwa kynthup yaka Muthlong-Sohkymphor, Tuber, Musniang-Rangad, Rymbai-Khliehriat, Sutnga-Narwan, Sutnga-Nongkhlieh, Sumer, Saipung-Nongkhlieh, Narpuh, Bataw-Lakadong, 

Ya kani ka Public Hearing da pynman ha Community Hall ka Khliehriat West, East Jaiñtia Hills.

Ha ka pynsñiaw da yoh i klam na ki paidbah ka thaaiñ Saipung wa kynthup ya u MDC wa katni, u Arbor Hima Darnei uwa da ong wa ka jaitbru Biate man ko kawa kyrpang heiwa da yoh ko ya uwi uwa mihkhmat ha ka JHADC kamtæ ha u 1967 u Lat ka jylla da e bor u leh yeini. Da ong u wa neipor cheipor wa nachwa ha i phiah Constituency ym jooh tba ya ka Saipung tangwa ha kani ka kynti da pynkhih ya ka.

Chooh chooh da ong u wa ki Biate toh kiwa khian paaid kiwa man kiwa kyrpang bha i rukom im wei dang boon ki chnong kiwa dang sahdien ha kiwa boon ki liang kamtæ da kyrpaad ya ka Committee wow pynneh yaka Constituency kamwa jooh.

Kiwi kiwa da klam na thaaiñ Saipung da dawa ki wow pynneh ya ka Constituency kamwa jooh man ha ki por wa da lai wei ymtoh kamwa thmu katni ka Saipung-Nongkhlieh Constituency.

Neiliang u Waheh Chnong wa u Secretary ka Shnongrim da pyrchah ki yei phiah ya ka Constituency deiwa dawa wow pynneh ya ka chnong kamwa man nachwa.

Ka Dorbar Chnong Dkhiah East kawa katni da tyrwa wow em ko kattu hapoh ka Sutnga-Narwan, tangwa lyngba u Waheh Chnong wa u Secretary da pynsñiaw ki wa ha ka 6 tarik uni u bnai da rai wow pyrchah joor ya i rah ya ka cha ka kawi tawon ka Constituency thymme.

Kiwi tawon ki chnong wa da pyrchah yei em ki ha ka Sutnga-Narwan Constituency kawa thymme katni toh ka chnong Sahkai, ka Jalaphet Bri Sutnga wa kiwi kiwi.

Heiyatoh wa i tyrwa wow chna thymme ya ka Sutnga-Nongkhlieh Constituency, u Asst. Waheh Chnong wa Secretary ka Chiehruphi da ong ki wa haka Dorbar Chnong wa da chong ha ki sngi wadep da rai wow pynneh ya ka Narpuh Constituency heiwa lada ym pdiang daw Boycott namo daw dam ki u thap Vote ha ka Election. Da ong leh wa da ki phaw snem da em ki ha ka Narpuh Constituency heiwa katni da pynjngai ya ka chnong cha Sutnga-Nongkhlieh iwa jngai hadooh 50 km iwa man iwa bakla.

U Waheh Chnong ka Dieñchynrum da ong u wa katni da pynpsiah yaka cha ka Sutnga-Nongkhlieh heiwa da dawa u wow pynneh hapoh ka Rymbai-Khliehriat Constituency kamwa man nachwa.

Neiliang u Waheh Chnong ka Moolamylliang leh da pyrchah u wow pynpsiah ya ka chnong cha ka Sutnga-Nongkhlieh deiwa kyrpaad wow pynneh ya ka ha ka jooh ka Constituency warim.

U Reading War na Latyrke kawa da pynhaap noh hapoh ka Sutnga-Nongkhlieh, da ong u wa ha kiwon kiwon ki phiah ya ki Constituency toh u man i ya i myntoi ki paidbah tangwa manda pynmih ya i tyrwa da chem wa kani ka Constituency ymtip de ha kayi ka yurim wa phiah kamni deiwa kyntu ya ka Committee wow ap ya i sur ki paidbah.

Neiliang u Waheh Chnong ka Huroi da ong u wa kamwa rai ki le chnong kitæ ka Huroi, Leijri waka Lahalein wow pyrchah yei thmu wow rah cha Bataw-Lakadong Constituency, da kwah ki wow neh kam warim hapoh ka Narpuh Constituency neidaw wa ki chnong em ki ha khappood rap suk ki u lai cha Narpuh ymtoh kamwa toh u lai cha Bataw-Lakadong.

Ha kani ka Public Hearing da mih i sur na boon ki chnong wow kyntait ya i thmu wow phiah ya ki Constituency JHADC hapoh East Jaiñtia Hills heiwa da dawa wow pynneh ya ki chnong kamwa man ha ki Constituency nachwa.

Neiliang ka Committee da pyntip ko wa daw pdiang ko ya kiwon kiwon ki buit na ki paidbah wei ye u pynpoi ya ki hapoh 3:00 waje i sngi yong ka 19 tarik uni u bnai.