Ka Jowai Municipal Board ha ka thong wow yada yei man khooid man kyntang ka wah Myntdu, da dep booh thong ko wow chna ya ka In-situ Nala yow pynlang yei jhep i jakhlai chi thaw ha man ki dooid ki liar ki chka kiwa kai cha ka wah Myntdu wei i kaam heiyatoh wa kani ka thong da lai i chakhmat heiwa ha uni u bnai ka Jowai Municipal Borad da sdang ko u chna ya ki Insitu -Nala ha ki ar tylli ki thaw wa em sa ha dong Panaliar kiwa tip kam ka Synrang Waiong wa ka Urkyrdain.
Neiliang ka Jowai Municipal Board ynne hei yahkhmat u Chairman, u L.D. Lakiang, ka CEO ka Jowai Municipal Board, ka D.V. Lyngdoh, MCS deilang u Engineer ka JMB chirup wa ki waheh wasian ka Seiñraij Jowai wa kynthup ya u Arwotki Sumer, General Secretary, u Hambiness Passah, Vice-President wa kiwi deilang leh u Khroo Lamsalanki Pariat, President ka seiñ Khooid Ya Ka Wah Myntdu wa ki dkhot ka Jaiñtia Fishing & Environment Protection Association da li peit li yoo ki ya i kreh i chna ya kini ki Insitu-Nala.
U L.D. Lakiang da khana u wa ka Board da booh thong ko wow pyndep ya kini ki nala hapoh u Niasan 2023 wei daw chna leh ya kam kini ki nala ha kiwi ki thaw wa noh ki dooid ki liar wa kai cha ka wah Myntdu. Kamtæ da kyrpaad u leh ya kiwa chong chnong yong ki dong ki chnat waphær wow chimkhia noh ki u chna da ki Septic Tank ha ki yung ki sem yong ki wei neiliang ka Jowai Municipal Board leh e ko i yarap cha ki manyung wa chna ya ki Septic Tank.
U Khroo Lamsalanki Pariat da ong u deiwa chna ya ki In-situ Nala u yarap ko u pyndooh kamwa 80% i jakhlia ka um hachwa wow tooid u kai i jakhlai cha ka wah Myntdu wei kyrmen yooluti u leh wa dei chimkhia ka Jowai Municipal Board chirup i yakrehlang yong ki bor dong bor chnong u man i kyrkhu wa khroo ya ka chnong Jowai waroh kawi.
Kam wa pynkynmoo i chimkhia ka sorkar jylla lyngba ka Jowai Municipal Board wow leh yeini toh hadien ka hukum yong ka NGT wa da booh ujor da u S. Laloo pyrchah ya ka sorkar jylla neibynta wow yada yei man khooid man kyntang ka wah Myntdu katwa neibynta won wow ye ka Jowai Municipal Board u leh yeiwa emkaam ha kini ki thaw, ka Seiñraij Jowai won da e sñiawbha ko yei thaw yong ka hei wow chna ya kini ki nala ha Synrangwaiong wa ha Urkhyrdain.
Puræ leh: Da chna ya ki liar wow ksoh jhep chwa wow poi cha Wah Myntdu
