Ka Joint Action Committee (JAC) kawa yieñ pyrchah yei thmu yong ka sorkar wow chna ya ka Umngot Hydro Power Project, ynne ka sngi da lai yachem ki ya u Montri ka sorkar MDA uwa man leh u MLA ka Mawkynrew Constituency, u Banteidor Lyngdoh wow pynsñiaw wei kyntu ya oo wow yaklam ya ka sorkar yow phah pynsangeh noh ya itai i thmu wow Dam ya ka wah.
U Secretary ka JAC, u S. Mukhim da ong u wa lada ka sorkar lai ko chakhmat wow Dam ya ka wah Umngot, ym banse wow thom ya ka aiñ, neibhah daw dooh ya ki thaw ki bhaw, daw ktah ya i rep i riang wei daw dooh leh yei mantre ya i khyndaw i chyiap. Da pyntip u leh wa i yachem ya u Montri ka rep ka riang man ko leh yow pynsñiaw yei eh kiwa chong chnong lada lai itai i thmu.
Da pyntip u leh wa ki paidbah ha katai ka thaaiñ em ki boonjait ki rukom im lada ha i rep i riang, neibhah wa em ki ya ki bri soh wa bri saroo, ki pynthor kba wa ki jait jhoor wa rep ki, wei kiwa chong chnong ki chaniah wei im ki harood yong ka wah Umngot, wei ini i thaw toh u neh ki ya ki pateiñ wa daw wan leh yow im ki.
Da pyntip u wa u Banteidor ym pu ye u wow e ya iwon iwon i kular, neibhah wa hap u wow ap leh ya kiwi ki liang kam kiwa mihkhmat paidbah, heiwa da ong chooh chooh wa u Montri daw ap lang u leh ya i rai yong ka kynhun Montri.
Neiliang u Chairman ka Darrang Tourism Development Society, da ong u wa ki paidbah ha Jaiñtia im ki deiwa kamai lyngba ki kaam uiñke suwari ha ka thaaiñ, deiwa pynsñiaw wa ka pyrthai ka tip ko ya ka wah Umngot kam kawa jngiar dooh wei lada wanrah ya ka Dam, itai i naam leh daw dooh noh. Chooh chooh da ong u wa ka sorkar toh u thooh laad ko da kiwi ki thaw wow Dam.
