Hadien wa da e ya eki u ya ka chithi Sanction Letter ya ka Nongtalang College lynga ka People’s College Scheme, ynne ka sngi won da yoh yarap sa ka Jaiñtia Eastern College, Khliehriat na kani ka Scheme.
Ha kani ka sngi da em ka yalang wa tbiang ha kani ka College heiwa u montri ka chnat puræ puthi, u Lahkmen Rymbui da man u kam u kongsan, hei emlang u Montri ka chnat Social Welfare uwa man leh u MLA ka Khliehriat, u Kyrmen Shylla, u MLA ka Sutnga Saipung u Shitlang Pale, u Principal kani ka College, u P. Nongtdu wa kiwi kiwi.
Neiliang u Kyrmen Shylla da ong u wa dap u dei sñiawkmen wa kani ka College da man ko kawa ar hadien yong ka Nongtalang College wa yoh ya kani ka Scheme wei da ekhublei kyrpang u ya u montri ka chnat puræ puthi wa da kreh chitom u hadooh wa yoh ya ka.
U Lahkmen hawa e yei klam da ong u wa ka sorkar jylla nadooh ka sngi nyngkong da booh ko ya i puræ puthi haphrang dooh hei wow kyntu kynrong ya ka ha waroh ka jylla wei ini i yoh yarap ka College man i iwa na kitæ wei ya ini da ye u leh lyngba i yahkhmat u Montri Rangbah ka jylla, u Conrad Sangma.
Chooh chooh da ekhublei u ya ki sahep wa kiwa kreh ka chnat kiwa da kreh khlem sangeh wow pynman ya ini i kaam iwa jop wei da kyrmen u wa kani ka College daw ye ko u e i chakri wa janai sam chaphrang neibynta ki khynnah ka thaaiñ.
Da i yoh yarap na kani ka Scheme, kamwa 31 ngut kiwa sikai ka College u yoh tulop ki na kani ka Scheme.
