Jowai: Sa chisien ynnin ka sngi u khloor yalehke Kickboxing na ka Ri-loom Jaiñtia, u Hameshaniah Suiam da wanrah naam biang u ya ka ri wa ka jaitbru deiwa yoh u ya ka takma rupa ha ka lympung WAKO World Cup Diamond Kickboxing 2019, ha Russia hadien wa da dep yoh u yaka takma ksiar.
Ynnin ka sngi u Hameshaniah da yakhun u ha ka Final yong ka kyrdan yakhun Kick Light -57 Kg Senior Men pyrchah ya u Bukbasarov Talgat yong ka ri Kazakhstan.
U Hameshaniah da chah pynrem noh u ha u Talgat wei da yoh u ya ka takma rupa.
U Hameshaniah myntu daw yakhun biang u ha kani ka lympung ha ka kyrdan Grand Champion (Open Weight Category in Point Fighting).
Kam wow pynkynmoo heini ya kani ka lympung toh kawa sdang nadooh ka 24 tarik hadooh 29 tarik ha Anapa, Russia wei da pynman ya ka da ka World Association of Kickboxing Organization chirup wa ka World Anti Doping Agency (WADA), ka Peace & Sports, FISU & International Fair Play Organization wa pynman da ka International Olympic Committee (IOC).
Heijooh i por neiliang u Wyrta daw pyntip i chaphi heiyatoh wa kani ka lympung deiwa kitbok ya u Hameshaniah wow rahnaam biang u ya ka ri.
Discussion about this post