Ynne ka sngi u Chairman ka Jowai Municipal Board (JMB), u Fidel War da ong u wa ka Board dang toh u yoh ko sa kamwa T. 40 Lak na ki Dorbar Chnong wa em ha Jowai na ka bai kit jhep na man la ki manyung wa em ha ki chnong wa em ha Jowai wei kini kynthup ki leh ya ki yaaw ki haat kiwa em hapoh Jowai,
Ya ini da ong u Chairman ka Board heipor wa e yei klam ha ka yalang wa pynkup burom ya ki wakreh ka Board da ka Dorbar Chnong Mynthong, Jowai ynne ka sngi.
Da ong u leh wa deiwa yoh ya kani ka poisa daw ye u pyndap yei emkaam ka Board wei kamjooh leh ya ka tulop ki wakreh yong ka kajiak heiwa da kdaw u wa wot oo leh heipor wa chim u ya kani ka chuki kam u Chairman da chim u du ya ka bai phñiang.
Chooh chooh da ong u wa ka JMB da toh i por wow ye ko u pyndap yeiwa emkaam ko pyn daka yaka hi wei ymtoh de u kyruiñ ko cha kiwi ki thaw heiwa da kdaw u leh wa lada man ki kaam wa jop, neiliang ka Board daw ye ko u wanrah ya kiwa boon ki kaam pynroi nadooh i wanrah ya ki kari kit-jhep, ki pooh-chiloom namo JCB, ki luti lai-kjat, ki thaw noh jakhlia, ki Septic Tank wa kiwi kiwi.
Kam wow kdaw heini kiwa kreh ka JMB kiwa em kamwa 40 ngut, kattu la kamwa 6 bnai ym em de u yoh tulop ki heiwa khadooh dooh wa yoh tulop lo toh ha u Wisu (March) yong uni u snem.
