Ha ka 31 tarik u Naisan, neiliang ka Jaiñtia National Council (JNC)-Western Zone ryngkat i synraan lang kiwa kitkaam ka CEC da lai hiar ki cha ka chnong Lapangap heiyatoh wa i chah pynyap u warep wa tip kam u Tellme Talang ha kini ki sngi wa dep.
Ka seiñ da yoh ko leh wow yachem wa u waheh chnong ka Lapangap, u Deimonmi Lyngdoh wei da lai hiar leh cha i thaw wa chem yei metyap heiwa u waheh chnong da khana u wa katkam ki dak ki chin ym ye u pdiang wa da leh yeini i kaam da ki bru napoh ka chnong wei da suba joor wa da leh yeini da ki bru kiwa na baar chnong neibhah kani ka chnong toh kawa em ha khappood waka Assam.
Da lai yachem leh wa ki pulit ka Nartiang Police Station heiwa da pyntip cha ka seiñ wa i takit toh iwa dang lai chakhmat wei ym pu tip kiyi wa emkti.
Neiliang u Vice President ka JNC Western Zone, u Hamehi Bamon da beiñ joor u yeini wa jia khamtam ha khappood neibhah ini ymtoh i sien wa nyngkong wa ki paradoh parasnaam yong i da maad ki ya kam ini wa jia wa sñiawsih wei sa katwon sien kiwa em cha kani ka thaaiñ u maad ki yeini i mih ki umkhmat wa kthang.
Ka seiñ da kyntu joor ko ya ka sorkar wa toh u leh ko wut-wut yeiwa emkaam deiwa kem ya kini ki bru wa thrang snaam wei ymtoh wow e li ya kiwon kiwon neibhah u chim yei mynsien khamtam ya kiwa dooh wa duk toh iwa poh tam.
Da kdaw leh wa hawa kiwi ki jaitbru chah pynyap ki hadooh katwon kreh chitom ki pulit wow kem wut-wut ya kiwa emkti wei ha kani ka kynti leh da kwah wow yoo yei kreh chitom ki pulit neibhah wym kwah ya ki bru yong i wow man ki kam ki langkñia man-i-por khamtam ha ki thaw khappood neibhah kani ka thaw toh kawa em i ya kynaad iwa da mih neipor cheipor wa kiwi ki jaitbru, kamtæ ki bor ka aiñ toh u leh ki yeiwa emkaam yow yoh yei bichaar wa biang tam.
Discussion about this post