Ha ka 31 tarik u July uni u snem, u Reachingson Siangshai da lai booh u da ka RTI ha yung krehkaam u DC ka East Jaiñtia Hills heiyatoh wa i thung kreh ka District Selection Committee (DSC) kawa da pynman hapoh ka District ha ki bnai wa dadep.
Kam wow pynkynmoo wa ha ka sien wa nyngkong dooh u Reachingson da lai booh RTI u ha ka 16 tarik u bnai May uni u snem hadien wa kiwa thap kreh da lai ujor ki cha oo wa i rukom thap kreh hapoh ka District ym em man iwa che wei neiliang yong oo da chim u ka luti wow lai booh da ka RTI yow yoh yei jubab wa che.
Ka RTI wa ar won heiyatoh wa ka DSC hi da li booh u ha ka 9 tarik u July uni hi u snem wei kawa le toh kani kawa dang dep booh u.
Ha ka 25 tarik u bnai June, u Reachingson Siangshai da yoh u ya ka jubab u lyngba ka RTI tangwa ym em won hun u neibhah katkam i tip yong oo, ong u ha ka kreh namo ka Post Sectional Assistant em du 2 tylli ki kreh namo ki Post wa lait katkam wa da pynbna heipor wa pynmih Advertisement, tangwa manda pynmih won ya ka Result da em hadooh 3 ngut kiwa yoh.
Da chem u leh wa ya ki Physical Test yong ar tylli ki Post ka DSC da pynman ha ki ar thaw heiwa neibynta ka Demonstrator Post da pynman ha ‘Old Deputy Commissioner Office’ katwa neibynta ka Post Gram Sevak wa Gram Sevika won da pynman ha ‘Football Stadium (Artificial turf), Deinshynrum’.
Ha ka RTI wa ar won da lai booh won u heiyatoh wa ki Marks yong kiwa yakhun tangwa yeini ym pu em yoh pynche næ jubab u hadooh ynne kamtæ daw yang u hadooh wa dap 30 sngi nadooh ka tarik wa lai booh u.
Ha ka RTI wa u Reachingson da lai booh khaddoh u toh hajrong kiwa boon ki bynta wa kynthup nadooh ki kor CCTV Video Recording wa kiwi de ki tiar wa emkaam u pynkhreh deiwa kylli lada pynemkaam hi mo ya kini ki kor heipor wa pynman Exam kam ka Written Test, Typing Test, Physical Test, Language Test wa ka Driving Test, da paan leh ya ki rai (Minutes of the Meeting) yong ki yalang (Meeting) wa ki dkhot ka DSC da chim ki ha ki yalang, ki daw wa da pynman ya ka Physical Test ha ar tylli ki thaw wa kiwi kiwi de ki yukylli heiyatoh wa i rukom pynlai heipor wa thung kreh ki hapoh kani ka District.
U Reachingson da pynkut u deiwa ong wow yang ya waroh ki jubab kiwa daw yoh na ka DSC lyngba ka RTI wei daw pyrkhat won u ya ki laad ki luti wow chim u heiyatoh wa i rukom thap kreh hapoh kani ka District hadooh wow man iwa bait wei che.
Discussion about this post