Ka KSU hadien wa da hiar ki chapoh ka jylla Manipur wow yaklam wei yachem wa u Montri Rangbah ka Manipur heiyatoh wa i chah knieh thaw ki Khynriam, ki Pnar wa sah ha ka Tamelong District katai ka jylla.
Ynnin ka 12 tarik, hajrong ini i jooh i kaam ka seiñ hapoh i yahkhmat u Donald V Thabah, General Secretary deilang wa ki kattu katni ki dkhot ka Central Executive Council da lai ki wow yachem wa u Montri Rangbah ka jylla u Conrad Sangma.
Ka seiñ da khana ko yei chah knieh i thaw ka jaitbru yong i kiwa sah ha Khedagar Khasi Punji, Tamenglong District, Manipur deiwa khana leh wa dadep wow e dorkhat leh cha cha u Montri Rangbah ka Manipur, u N. Biren Singh.
Neiliang u Conrad da kular u wa daw thoh wei yaklam wa u Montri Rangbah ka Manipur yow pynsmat noh yei khyndang ya kiwa baam yei thaw ki Khynriam ki Pnar ha Manipur.
Kiwa boon wa em thaw ha Manipur toh ki jait Shylla, Suchiang wa Suchen kiwa da sah nadooh u snem 1939 ha i chnong Khedagar Khasi wei da em ki kamwa 600 ngut kiwa chong chnong hei thaw wa heh 200 Hectare heiwa kamwa chitieñ da wan wow chong chnong da kiwi. Ha Abam Punji da em ki 1010 ngut ha i thaw wa heh 160 Acre katwa ha Kamrangha Khasi da em ki 1500 ngut ha i thaw wa heh 190 Hectare heiwa 120 Hectare toh kiwa da chah knieh.
Kini ki toh kiwa boon da imja dei rep pathi.
